Aizawl : African Swine Fever (ASF) vangin Mizoram ah vawk 33,417 an thi a, hemi avanga Economic lose chu cheng vbc. 248.26 a ni. Hetihlai hian sum harsatna vangin Mizoram sawrkar chuan calamity (vanduaina) ah a la puang thei lo a. Hemi vang hian zangnadawmna pek theih a la ni lo.

March 9, 2022, Nilaini budget session neih a a demand sawihona a khaikhawmna ah he thu hi sawiin, AH&Vety minister chuan ASF vanga vawk thi 33,417 zinga 10,910 chu tihhlum/suat (cull) a nih thu leh chung vawk suat zawng zawngte hlutna chu cheng vbc. 97.51 a nih thu a sawi.

AH&Vety minister sawi danin, dan awmsa angin ASF vanga vawk suatte hlutna chu an len dan a zirin a hlutna chhut a nih thu leh central sawrkar leh state sawrkarin 50:50 in zangnadawmna pek tur an ni a, chumi ang chuan cheng vbc. 48.75 chu central ah dil mek a ni.

ASF vanga vawk thi te pawh an upat dan a zirin an hlutna chhut vek a nih thu leh chumi ang chuan vawk thi hlutna chu cheng vbc. 60.88 a ni.  "Disaster Management Authority (DMA) ah zangnadawmna pek tur kan dil a, amaherawhchu DM&R in sum harsatna vangin calamity ah min la puansak theilo, hemi vang hian zangnadawmna pek theih a la nilo," a ti. Tun dinhmunah Planning lamah zangnadawmna chungchang chu an thlen leh mek thu leh beisei tur a awm dawn leh dawn loh erawh hriat a la nih rih lo tih a sawi.