Asia khawmualpuia ram pasariha chanchinbumite telna, Asia Indigenous Peoples Pact (AIPP) Communications programme hnuaia Indigenous Voices in Asia Network (IVAN) Regional Exchange chu Zirtawpni khan Chiang Mai, Thailand-ah tan a ni a, ni thum awh hun hman turah hian Mizoram atangin Mizoram Journalists’ Association (MJA)  member, Lalnunkimi Colney (Kimi Colney) a tel.

He hunah hian thlirna hrang hrang atanga ram hrang hranga tual chhung media-te dinhmun leh hma lam hun te zirho a ni a. Asia khawmualpui ram hrang hrang atanga chanchinbumi kalkhawmte hian an tual chhung media theuh chanchin leh an harsatna tawh te, hmasawn dan tur hrang hrangte an sawiho a ni.

Mizoram atanga tel, Kimi Colney pawhin thu sawiin India rama chanchinbu miten India-in Mizoram a bomb chungchang engmah an ziah loh thute a tar lang a. Vawiin thlenga zau taka mi tam zawk hnena Mizoram leh India hmarchhak state-te tana aw chhuah a la harsat reng thu a sawi bawk.

Tual chhung chanchinbumite chu khawtual mite tana aw chhuahtu satliah mai ni lovin mipuiten hun harsa an tawha thu dik hai chhuahsaka zau zawka an dikna chanvo pho lansak tura an beisei ber an nih thu a sawi bawk.

AIPP hnuaia IVAN hi kum 2013 khan Asia khawmualpuia indigenous journalist, non-indigenous journalist leh indigenous rights activist-ten thawhhona tha an neih theihna tura din a ni a. Media zalenna leh indigenous mite humhalh leh chawi lar chu a tum ber a ni.