Aizawl August 14, 2024 : Serchhip District Boxer chhuanvawr Justin M.Lalthanpuia S/o Hmingsawilai, North Vanlaiphai Damdawi Veng chu Asia Khawmualpui Boxing a inelna sang ber Asian Championship 2024 khel tura thlan a ni a, August ni 27, 2024 khian Dubai, Abu Dhabi ah an inhnek tan ang a, he Championship hian September 10, 2024 thleng a awh ang.

Serchhip Times atanga thu dawn danin Boxer Justin M.Lalthanpuia hi tunah hian Shillong Army Boys Hostel ah a awm mek a, Mizoram pum huap Boxing inelna liamtham - Mizoram State Boxing Championship, Inter District Boxing Championship leh Mizoram Open Boxing Championship ah te Gold Medal a lo hnekchhuak tawh a, Delhi bul, Greater Noida hmuna Sub-Junior Boys & Girls National Boxing Championship 2024, kumin March ni 25 a neih zawh takah 43-46 kgs weight Category Final Bout ah Haryana Boxer hnenin Gold Medal a lo hnekchhuak tawh bawk.

Hemi hnu hian Justin M.Lalthanpuia hian phailama Boxing zir tura sawmna a dawng nghal mawlh mawlh a, Lunglei SAI atangin Haryana Rohtak hmunah te awmin tunah hian Shillong Army Boys Hostel ah a awm mek a, August ni 16 khian Karnataka-a IIS JSW Vidyanagar-ah Camp turin a lut zui lehnghal ang a, heta tang hian Dubai ah inhnek turin a chhuk leh ang.

Serchhip District Boxing Association(SEDBA) chuan an Boxer Justin M.Lalthanpuia’n International Boxing - Asian Championship a khel thei tur chu an lawmpuiin an chhuang takzet tih an sawi a, Gold Medal rawn hnekchhuak ngei turin duhsakna sang ber an hlan tih an sawi.