AFC Asian Cup khelh tura India team-a awm mek, Lallianzuala Chhangte chuan a phur a, a châk tawh tak zet tih a sawi.

Lianzuala hi Mizo tlangval dang pahnih, Lalchungnunga leh Lalengmawia (Apuia) Ralte te nen Igor Stimac-a team-ah telin December 30 khan intihsiakna hmun tur, Qatar khawpui, Doha an thleng a, inbuatsaihna an kalpui mek.

India tana player pawimawh ber pawl ni mek, Lianzuala hian, “Ka phur a, ka châk tawh hle,” tiin Asian Cup an khelh tur chungchangah the-aiff.com hnenah a sawi.

“Inelna sang bera ram tana inlan hi chawimawina a ni a. Kum 2019 khan ka khel phak lo tawh a, tunah hian ka tan a taka suangtuahna chang ang a ni tak zet a ni,” tiin a sawi.

Rawlthar mai a nih lai, kum 2015 atanga India tana khel tan, Lianzuala hi 2019 Asian Cup-ah khan a tira India tana inlan tura koh chhin zingah tel mah se a tak takah erawh a tel pha lo thung.

“I hun tawpah i hun lai i thlirlet ang a, a sang bera inkhelh i duh ngei ang. Heng ka tawnhriatte hi keimahah a awm reng tawh dawn a. Asian Cup squad-a ka tel thei hi vannei ka inti tak zet a. Ka tan chuan a ropui em em a ni,” a ti bawk.

A changa team-a a tel phak lo te, hliamin a tihbuai thinte chu tawnhriat tha tak a nih thu leh tuna ‘puitling’ a nih theih chhan a nih zawk thu a sawi.

“Player ang leh mihring mihrinnaah pawh puitling ka ni ta a, hun khirh tak tak ka tawhte khan min pui a ni,” a ti.

“A bikin kum 2021-a hliam avanga buaina ka tawh leh team-a tel phak loh ka nihte khan zirlai tam tak min zirtir a. Hun harsa tak ni mah se thil pawimawh zawka insawrbing turin min pui a, tha zawka min chhertu a ni,” a ti.

“Heng thil hi tawk lo i la chuan tuna ka nih ang player hi ka ni pha lo vang,” a ti bawk.

Kum 26 mi, Lianzuala hi nikum khan ram leh club tan a che tha hle a. Tri-Nation Cup, Intercontinental Cup leh SAFF Championship-ah India a champion-pui a. Mumbai City FC chu AFC Champions League-ah inlanpuiin Asia khawthlang lama club tha ber ber - Al Hilal (Saudi Arabia), Nassaji Mazandaran (Iran), leh PFC Navbahor (Uzbekistan) te a hmachhawn a ni.

Indian Super League (ISL)-ah hian player tha ber nihna hauhvin Golden Ball a dawng a, Durand Cup-ah pawh hetiang tho hi a dawng a. FPAI Indian Player of the Year atan thlan a ni zui a, a aia hlu, AIFF Player of the Year atan thlan a ni leh bawk.

January 12 atanga khelh tan tur, Asian Cup-ah hian Mizo tlangval pathum telna India hian Australia, Uzbekistan leh Syria te group stage-ah an hmachhawn dawn.

“AFC Champions League-a ka inlan khan Australia, Uzbekistan leh Syria te eng ang nge an nih dawn tih min hriat thiamtir a. Engnge lo thleng tur rinlawk thiamna leh eng ang nge kan mamawhg tih kan hriat theih phah,” tiin Lianzuala chuan a sawi.