The Fighter world boxing-a Thai boxer te ngamtu Vanlalawmpuia leh F Zoramchhana te pahnih chu show huaihawttu Thai promoter  TL Promotion ten an hnuaia Asian title chuh turin an sawm.

Tun inrinni khan Spaceplus, Bangkok-ah India number one Khuangthing fighter Awpa'n super lightweight huangah round 6 an inhnek chhungin Aekkawee Kaewmanee a awpbet hneh hle a, unanimous decision-in judge pathumin 60-54 in an chaktir. Bantamweight-ah Zotea'n WBA Asia Flyweight champion hlui Yutthana Kaensa-a chu hneh bawkin unanimous decision bawkin a chak a, ram pawna an vawi khat inlannaah Mizo fighter pahnih an chetha hle a, The Fighter show huaitu Thai promoter TL Promotions te mit pawh an tlung dun hle tih a hriat a, an hnuaia khel turin an sawm zui nghal.

LPS Promotion hnuaia fehchhuak Mizo team coach Sete Lalchhuanawma chuan,"TL Promotions hian September-ah anmahni hnuaia Asia title chuh turin Awpa leh Zotea hi an sawm nghal a, a lawmawm tak zet a ni. Mahse, thu tawp siam nghal thei an nih loh avangin LPS Promotion, Marine Pro Boxing Promotions leh Sete Boxing Academy ten sawi ho phawt a ngai dawn tih hrilhin TL Promotions lam dawrna chu ka chhang," tiin a sawi. 

Awpa leh Zotea te hian inbuatsaihna an neih that em avangin leh strength and condition coach Zuia Sailoa'n a enkawl dan avangin hah lovin an khel tluan thei a, round 10 thleng khel thei turin an taksa a inpeih tih an sawi. Mizo team hian Aizawl an rawn thleng leh tawh a ni.