Aizawl; Assam Police chuan Mizoram atanga an state-a phurh luh tur kuhva hringte chu an la dan chhunzawm zel a. Mizorama kuhva thar tamna, Hachhek tlangdungin nasa taka an tawrh laiin Bilkhawthlir erawhin a sen laia hnam dang hnenah an hralh tawh avangin an buai nep niin an sawi.

Assam-in Mizoram kuhva an dan chungchangah hian hmalak mek reng a ni tih Kolasib DC John LT Sanga chuan ZALEN a hrilh a. “Assam lam hian duh dan neuh neuh an nei a, chung an duh dante chu Cachar DC-in min hrilh a. Thuneitu sang lam, home secretary-ah thlen mek a ni a, Mizoram kuhvate hi harsatna awm lova a tlang thuai kan beisei a ni,” a ti.

Taitesena Group YMA leh Langkaih Group YMA-in kuhva buaipui tura an din, Joint Group YMA Study Team Secretary Lalvenhima Ralte chuan Assam Police-in Mizoram kuhva an dan chhan ber chu an hriat loh thu sawiin, “Mi thenkhatten kuhva hring kara Burma kuhva ro an man vang te, tank lorry leh hatkora karah kuhva ro an man vangin kuhva hring pawh an dang ta zel niin kan hria a. Tripura lam pawhin an hralh theih loh avangin an buai ve hle a, hetia kuhva an dan chhan ber pawh hi hriatthiam a harsa hle a ni,” a ti.

Hachhek tlangdunga kuhva chingte chu an mangang hle nia sawiin, “Keini tlangdung hi chu hnam dang hian a tet laia an lei ang kha kan ni lo va, sumdawngte hian advance-in a man tlem chu hauh lawk nan an pe ve a; mahse, kuhva hralh hunah chauh full payment hi an tih avangin kan buai hle a ni,” a ti bawk.

Bilkhawthlir khuaa kuhva ching hruaitute chuan kar hmasa lam khan motor te phur engemaw zat chu hralh mahse tunhnaiah erawh Assam Police lamin kaltlang an phal lo tih ZALEN an hrilh a. "Tualchhung kuhva hring kara Burma kuhva ro lo phur ru thin an awm avangin an remti lo niiin kan ngai a. Kan kuhva te hi a sen laiin hnamdang hnenah kan hralh deuh vek tawh a, hralh lo hi tlema zawng an la awm a. Keini chu kan buai lutuk lem lo a, mahse kuhva hi Assam lamin phurh an remtih loh reng chuan a leitu vai leh vai bawk hi an la intibuai mai thei a ni,"an ti.

Hachhek leh Bilkhawthlir a kuhva chingtute chuan Assam sawrkarin kuhva hring phurh a remtih loh chhan zingah ramri buai phuba lakna leh kuhva leitu tam ber hi Bangladesh atanga lut te an nih avanga an sumdawnna hrek tumna pawh anih theih thu an sawi bawk.

Hachhek tlangdung hian nikum lamah kuhva hi vaibelchhe 30 hu vel an hralh a, kumin hian a rate a pangngai a nih chuan vaibelchhe 40 vel an lei chhuah an beisei. Mizorama kuhva ngah leh kuhva rah hralhna atanga sum lalut hnem ber thin, Bilkhawthlir khua hian kum 2019-2020 chhung khan kuhva atang hian Rs 69,155,600 an lei a, nikum 2020-2021 chhung khan kuhva rah hralhna atangin Rs 80,408,450 an lalut bawk. Kuminah hian nikum aia hralh that an beisei.