India hmarchhaka state lian ber, Assam chu tun laiin India ram chhunga thil liantham thleng pahnih awm mekna hmun a ni a. Maharashtra-a rorel lai, Shiv Sena MLA helten inkhuar nana an hman avanga ngaihven a hlawh mek laiin tui lian nasa tak avangin mi nuai tam tak an talbuai mek bawk.

District 35 a neih zinga 28-a cheng mi nuai 33 chuang zet chuan April thla a\ang khan tui lian hi an tuar tawh a. Tui lian leh lei min avangin mi 117 zet an thi tawh.

An state-a khawpui lian ber pahnihna, Silchar-ah phei chuan  khawpui hmun 80% chuang zet tuiin chimin mi tam takin tui leh ei tur kham an nei thei lo mek.

Khualrel chhiatna lian takin a chim mek lai Guwahati-a Radisson Blu khualbuk chu Maharashtra-a tangrual sorkara a khaipa, Sena-a party chhung buaina inmungna hmun a ni mek bawk.

Sena MLA hel mekte hruaitu, Maharashtra Minister Eknath Shinde chuan an party MLA zingah thlawptu a ngah zawk nia inchhalin a helna hian Maharashtra sorkar titlu thei hial tur khawpin thil a inmung mek.

An khawpuia Sena MLA-te inkulhna bulah hian a minister leh BJP hruaitute hmuh zeuh zeuh ni mah se Assam Chief Minister Himanta Biswa Sarma chuan an party chhunga buaina a nih thu a sawi thung.

Silchar khawpuia kawtthlerte tuiin a chim mek lai hian mi tam tak chuan BJP kaihhruai sorkarin a ngaihsak danah an lawm loh thu an sawi mek.

“Assam chu tuiin a chim mek a, hetih laiin Maharashtra-a minister-te chu chaw lutin five-star hotel-ah a thuneihna inchuh vangin a mikhual si maw? Hei hi em ni Assam sorkar chu?” tiin Silchar-a cheng pakhat chuan NDTV hnenah a sawi.

Mi dang pakhat pawhin Chief Minister Sarma chuan an tawrhnate chu enin tlawh ngei tur a nih thu a sawi ve bawk.

“Chief minister hi lo kalin kan dinhmun hi min rawn hmu se kan duh. Mi tam tak tui lian avangin che sawn thei lovin an awm a, a puih an mamawh ngawih ngawih a ni. Mi tam tak chu mahni in chhuahsan thei lovin an awm mek a ni,” a ti.

Guwahati khawpuiah ve thung chuan Congress kaihhruaiin eptu party hrang hrangte chuan BJP kaihhruai sorkar duh lohna an lantir mek a. Maharashtra MLA-te chu thawn haw tur leh sorkar chu tui lian tuarte puihna lama insawrbing turin an phut tih an sawi.

Tui a len mekna hmunah chuan National Disaster Response Force team-in chhun zan zawmin chhanchhuah leh chhawmdawl hna thawk mah se mi tam takin tui, ei tur leh damdawi an nei lo va. Indian Air Force chuan thlawhnain hmun thenkhatah mamawh zualpui a thlak bawk.