February 9, 2023; Chief minister Zoramthanga'n Aizawl khawpui laili atanga Assam Rifles te an chhuahna turin sawrkarin theihtawp a chhuah tih sawiin, an insawnchhuah kim lek lek tawh thu a sawi.

Vawiin Assembly Budget Session a Revenue Minister Lalruatkima bill put luh chungchang a sawi zauna ah chief minister chuan, Covid hma khan chhuak vek turin Home Ministry pawhin order an rawn pe tawh tih sawiin, chu order chu sutna a la awm lo niin a sawi a, chutirualin, Covid vangin chet hleih theih a ni ta lo niin a sawi.

Chief minister sawi danin, an awmna thar tur a an insawnchhuah a hun tawh e tiin, helama an commander te an sawipui bakah Home Ministry lam pawh nawr an ni a, AR lamin chhuanlam an ngah a, chung an chhuanlam hrang hrang, tui a ni emaw, kalkawng a ni emaw, electric leh pawimawh dangte chu siam zawh thawkhat tawh a ni. 

Union Home Minister Amit Shah chu Mizoram lokal a, AR headquarter thar hawng tura tih niin, a hun atan November 2022 rawt a ni. Hetihlai hian Gujarat inthlan leh a hnu a inthlan awm chho vangte in Amit Shah chu Mizoram a lokal thei ta lo.

Assam Rifles te chu Aizawl laili atanga an chhuah thuai a tul tih CM chuan sawi bawkin, a chhan lian tak a tarlan ah, Laldenga Cultural Centre atan Smart City atangin Rs. Vbc. 100 dah a ni a, chu chu liam thei a ni.