Aizawl July 5, 2023 : ZPM Thalai chuan Mizoram Legislative Assembly Secretariat hnuaia Translator, Assistant, Lower Division Clerk (LDC) leh Upper Division Clerk (UDC) hna lakah thil fel tawk lo a awm ngei niin a lang, hna lâk fel fai lo avânga beiseina nei thalai rilru thianghlim tak takte rilru na taka an awm tiin pawi an tih thu an sawi.

ZPM Thalai chuan he thil hi a chîn chhuâka chhui tur leh a mawhphurtute chunga hremna na tak lek turin MNF sawrkâr an phut. "MNF sawrkâr hnuaiah hleih nei taka ro rel a ni thin hi pawi kan ti a, tun tuma Assembly Secretariat hnuaia hna hrang hrang lak danah hian MNF sawrkâr chu mipui huapzo sawrkâr a nih lohzia chiang takin a lang a, thil awmzia sawifiah thuai turin Assembly Speaker Lalrinliana Sailo kan phut a ni," a ti.

Hna lâk kawngah a thiam zawkte aia sawrkâra thiltithei zawkte thlan chhuah an ni thin tiin ZPM Thalai chuan an ngai thu tak hle an ti a, MNF sawrkâr chu thalaite tân beiseina kawl êng a siam thei lo a nih pawhin beidawnna thlen belh tawh lo turin an ngen a ni.