Aizawl : Mizorama Pathian thu zirna in hlun leh lian ber Aizawl Theological College chuan kum tina an tih thin angin November 22, 2019 (Zirtawpni) khan College Day an hmang a. He huna thupui sawitu Rev. C Rosiama chuan,"Rawngbawltu chu a tul huna zawlnei hna thawka au chhuak tur kan ni," a ti.

Kum 2019 ATC College Day-ah hian, ‘Challenges in Our Christian Ministry Today’ tih thupui hmangin Rev. C. Rosiama chuan thu a sawi a, ATC acting principal hlui hian, tunlaia kohhran duh khawp lohna leh an sawi-selna hrang hrang chhawp chhuakin, an sawiselna chhante a tar lang.

"Rawngbawltu hian Pathian thu hi tupui ber ila, ram rorelna thuah te, ei leh bar zawnna thuah te, vantlang nun ho kawnga harsatna kan ramin a tawk a nih chuan, zawlnei hna thawka au chhuak tur kan ni. Chutih rualin zahawm tak, hawihawm takin a sawina tur tak leh a sawi hun taka sawi a pawimawh," a ti. Rawngbawltute chu hawihhawm taka mi tin dawng sawng a, Kohhran mite biak phak leh biak theih renga awm turin a chah a, “Chanchin |ha nunpuiin, kohhran leh khawtlang siam tha khawpin Pathian ram i thlen tir ang u,” tiin kal khawmte a chah.

Kumina zirlai chhuak zinga tha ber lawmman (Best Outgoing Student Award), Dr. C. Biakmawia Prize chu C. Zaihnuna, New Champhai hnenah hlan a ni. College Day lawmnaah hian ATC Male Voice leh ATC Zaipawlpuite an zai a, Rev. Dr. H. Vanlalruata'n lawmthu a sawi a; Synod Secretary (Sr.) Rev. R. Vanlalnghaka'n malsawmnain hun a khar.

Kum 1907-a Tirhkoh zirna sikul atana hawn ATC hi kum 2013 atang khan Doctor of Theology zirnaa hlankai a lo ni tawh a. Principal report-a a lan dan chuan tunah hian zirtirtu 29 an bung mek a, thawktu dang mi 32 an awm. Kum 2019-2020 Academic session-ah hian BD zirlai - 108, M.Th zirlai -56, D.Th zirlai -6, a vaiin 170 an awm a ni.