MST Motors chuan Mizoramah India rama electric scooter fak hlawh, Ather la lutin Thawhlehni khan Bawngkawn, Aizawlah showroom leh service centre hawngin 450X scooter an pho chhuak nghal.

Bethel Ministry Speaker Federick Lalrindika’n ribbon chep chatin Mizorama Ather showroom leh service centre hawn hnuah Pathian hnenah a hlan a, MST Motors chuan duhsakna hlan let ve nghalin Pathian rawng an bawl zelna turah tangkaia an hman atan electric scooter thar an pe a ni.

Mizorama Ather dealership hawnnaah hian MST Motors chuan mi 10 hnenah 450X electric scooter an hralh chhuak nghal.

Info Bikes hotupa, Vanlalmuana chuan, “India rama electric scooter ka khalh chhin tawhah Ather aia Mizoram tana hman tlak, tha leh nalh bawk si a awm lo a, kawng chho hrang hranga kan khalh chhin tawhah zawh lohna a nei lo,” a ti.

450X hi pro-pack tel lovin Rs 1,53,207-in an hralh chhuak a, pro-pack tel a nih chuan Rs 1,69,205 man a ni ve thung.

Mizorama Ather scooter nei hmasa ber leh India hmar chhaka nei hmasa zinga mi, Lalrawngbawla chuan kum khat leh a chanve a khalh tawh chhungin hman tlak a nihzia finfiahna tha tawk a neih thu a sawi.

“Petrol lak leh oil thlak a ngai ve tawh lo va, polution certificate lak a ngai lo bawk. Lirtheiin boruak chhia a pek chhuah venna tha tak a nih laiin India leh state dangten electric lirthei neitute tan hamthatna an siamsak thin angin Mizoram sorkarin ngai pawimawh ve thei se a duhawm hle a ni,” a ti.

Hetih lai hian MST Motors hi October 2-a tan tur, Tata SK 612 LPS Pro Fight sponsor-tu zingah an tel a, boxer tha ber hnenah Ather electric scooter an pe dawn a ni.