Naupang kawthalo laka venna tur vaccine ‘Rota virus vaccine’ chu August thla atangin Mizoram pumah a rualin pek tum a ni.

State EPI Officer Dr. Lalzawmi’n Zalen a hrilh danin, “Rotavirus vaccine hi kan nei vek tawh a, state leh district level ah pawh zirtirna pek a ni tawh a, mahse tunhnaia Doctor lut thar leh mi thenkhat training pek loh an la awm a, training te hian karleh mai khian an zo dawn a, mahse a ruala pek kan duh avangin August thla hi kan tinzawn a ni,” a ti. Dr. Lalzawmi chuan Rotavirus Vaccine chu naupang kum 1 hnuailam hnenah a thlawna pek an ni dawn tih sawiin, “A damdawi hi a thlum lep lep a, naupang tan pawh ei a hrehawm lo turah kan ngai a. Damdawi man hi a to hle a, private-ah chuan Rs. 20,000 lai te a ni,” a ti bawk. Rotavirus Vaccine hi Sub Centre ah pek an ni dawn a, naupang chu an ka ah far 5 a pek an ni dawn a ni.

Rota virus vaccine hi naupang kar 6, kar 10 leh kar 14 a upa te dose 3, far 5 zela pek thin tur a ni a. Medical mi Rota virus chungchanga training nei ten vaccine hi naupang an pe tur a ni. India ram state engemaw zat chuan vaccine hi an pe tawh a, hmarchhak state hi a pe har zingah a tel a, hmarchhak state zingah Tripura leh Assam ten he vaccine hi a hmalamah an lo pe tan tawh a.Tun dinhmunah chuan Mizoram bakah hmarchhak state dang la pek lohna zawngah pek tan turin Ministry of Health & Family Welfare, Government of India chuan ruahmanna a siam a ni.

Rota virus vaccine hi vaccine dang chi hrang hrang Health Department-in a pek thin (Routine Immunisation) a tel tur a ni a. Rota virus hi kawthalo natna thlentu tam ber a ni a, naupang damlohna leh damdawiin hial thlen thintu a ni bawk. A natna enkawlna atan chhungkua a sum tam tak sen ralna bakah thihna hial thlen thei a ni bawk. Rota virus vaccine hian rota virus avanga naupang kawthalo natna thleng tur lakah 40% atanga 60%-in a veng thei a, vaccine hi a nawlpuia vaccine pek thin zingah khawvel ram 96 ten an telh tawh a. Private hospital leh private medical miten kum tam tak chhung he vaccine hi an lo pe tawh a ni.

He vaccine hi a scientific taka WHO position paper-in him tawkah a puang tawh a. Mi tu pawhin ngaih ngam taka naupang hnenah Rota virus vaccine hi pe tur leh hemi kawnga health department hmalaknate a theih ang anga tawiawm turin Health department chuan mipuite an ngen.