2022-23 Premier League hi November thlaah Qatar World Cup khelh a nih dawn vangin, hun danga an tih ngai loh ang takin kar ruk chuang zet mid-season chawl an hmang ang. FIFA world cup vangin November ni 12-13 atanga December ni 26 thlengin Premier League khelh a ni dawn lo va, hemi hma hian club lian inhmachhawn tur an awm lo bawk.  

Premier League tan tirh August ni 5-ah Crystal Palace leh Arsenal an inhmachhawn dawn a, an match hmasa berah champion lai Manchester City chuan season liam taa an hneh theih loh West Ham an hmachhawn dawn bawk. Pahnihna Liverpool chuan kai thar Fulham an hmachhawn dawn a, Newcastle mualah Nottingham Forest an leng lut bawk ang. Forest hi 1998-99 season hnuaa Premier League an khelh lehna hmasa ber tur a ni. 

World Cup hian December ni 18 thleng a awh dawn a, final hnu ni 8-ah Premier League season hi khelh chhunzawm leh a ni ang. Football Association lam ngenna angin Premier League-ah hian 'big six' an tih mai club lian leh tha ho chu World Cup hmain an inhmachhawn dawn lo a ni. 

2022-23 Premier League fixture

Zirtawpni, 5 August
Crystal Palace v Arsenal 

Inrinni, 6 August
Fulham v Liverpool 
Bournemouth v Aston Villa 
Leeds United v Wolves 
Leicester City v Brentford 
Newcastle United v Nottingham Forest 
Tottenham Hotspur v Southampton 
Everton v Chelsea

Pathianni, 7 August
Manchester United v Brighton 
West Ham United v Manchester City

Hemi hnu hian kar ruk aia rei World Cup chawlh an hmang ang. Football thuneitu sang Fifa chuan World Cup khel tur player te chu November ni 14 hmaa an ram tana practice-na hun pe vek turin thuchhuah a siam tawh bawk. Qatar khawmpui lian awm hma hian Premier League match 16 a awm hman dawn a, August-ah match nga, September-ah match thum, October-ah match ruk leh November-ah match hnih a awm ang. 

Manchester City hi 2021-22 a an champion dan kha a ropui dangdai hle a, inkhelh tawp ber zanah mak tak maiin Aston Villa an hneh a nih kha. Tun season hian Borussia Dortmund atanga an lei thar £51.2million man Erling Haaland chuan City tan a rawn khel dawn a, striker tha neilo City hian an thatpui dawn nge an chhiatpui dawn tih chu hunin a hril turah ngai ang. Kum 21 mi Haaland hian a Premier League khelh hmasak ber naah West Ham a hmachhawn hmel.