Maruti Suzuki-i'n a car hralh kal ber pakhat Alto chu generation thar siam chhuak thar lehin thla thar khian an tlangzarh ang. A ni tur tak erawh an la puang zar rih lo.

Media lam sawi dan chuan Alto model thar hi August thla tawp lamah tlangzarh theih a nih an beisei. Alto next-generation version hi a design, features leh engine mechanism lamah siam danglam nual a ni a, Maruti Alto siam danglam thenkhat i han bih chiang dawn chhin teh ang.

He car brand thar 2022 Maruti Alto hi architecture thar deuha duan a ni a, tun hma lama an siam chhuah aiin a zang a, a mawi zawk bawk a ni. 

A Engine lam pawh tun hmalama mi aiin a chak zawk dawn a, third generation model hian 1.0L K10C Dualjet petrol engine a hmang dawn a, S-Presso update a ni bawk. A motor hi tune thar niin a power hi 67bhp leh 89Nm torque a ni. Tun hma lamah 796cc engine aiin a chak tawh zawk dawn a ni. A lei tu turte tan CNG fuel thlan tur a awm bawk ang. 

Model thar hi a design a tha zawk a, a body san lam erawh thlak danglam a ni lo thung. A hmalam lan dan tih danglam deuh niin Celerio thar design nen a inang lek lek a ni. Alto thar-ah hian a feature an update bakah a radiator leh engine vengtu grille chu tih len deuh a ni a, a light pawh a lian deuh zawk bawk. 

Maruti Alto 2022 model thar hi a chhuak hmasa aiin a lian zawk a, Indo-Japanese auto duan Maruti Alto-ah hian thil thar leh a hmaa awm ngai lo an dah nual.