Rafael Nadal chuan tum hle mah se Australian Open a khel leh thei dawn ta lo va, Brisbane International-a a inhliam leh hnuah inenkawl turin Spain-ah a kir leh ta zawk.

Kum 37 mi, Nadal hi kum khat dawn a khel na avanga a tawmim hnuah kar liam ta khan Brisbane-ah inelnaah a inlan leh thei tan a, straight set-a vawi hnih a chak leh hman.

Zirtawpni khan quarter-final-ah Jordan Thompson hneh lovin a intina leh a ni.

Nadal-a hi uluk zawka en (scan) a nih hnuah a tha thler tenau deuh a lo awm a; mahse, a hmaa rei tak a chawlh chhan bawra mi kha a ni lo thung.

Spaniard hi ni 349 zet maltana a inkhel tawh loh hnuah Dominic Thiem hmaah a inlan leh a, result a hlawh chhuah pawh ‘chanchin lawmawm’ a nih laiin ‘intihsiakna sang ber hmachhawn tur chuan a la inpeih tawk lo’ nia sawi a ni.

May thlaah tawh khan kum 19 hnua avawi khat nan French Open-a a inlan theih loh tur thu a puan rualin kum 2024 lo awm tur chu a kum tawp ‘a ni thei’ tih a sawi tel a, heti a nih chuan vawi hnih champion a lo ni tawhna, Australian Open-ah hian kumin bak a inlan tawh loh hmel hle.

Tunah erawh chuan hei pawh hi a tih thei dawn ta lo tih a chiang leh ta.

“Ka kum harsa takah khan lo kir leh tur hian ka thawkrim hle a, ka tum ber chu thla thum chhunga keimaha a tha thei ang ber nih leh kha ka tum a ni,” tiin Grand Slam champion vawi 22 ni tawh, Nadal chuan social media-ah a tar lang.

“Melbourne mipuite hmaah ka inlan thei dawn lo tih puan hi a hrehawm a; mahse, thu duhawm lo tak a ni lo va, season tluanin atha zawkin thil a inher ang.

“Australia-a inkhelh hi ka duh em em a, chumi tur chuan tlem chu ka inkhel a, hei hian min tihlimin a êng zawngin min thlirtir.

“Min thlawpnaah ka lawm em em a, kan inhmu leh thuai dawn nia!” a ti.

Australian Open hi Melbourne khawpuiah January 14 atangin tan a ni ang.

Nadal-a hi tunah chuan French Open-a inlan tura a inbuatsaih a ngai ta zawk a, vawi 14 zet a lo champion tawhna inelna hi May 20-ah tan a ni ang.

Grand Slam-a a inlan hnuhnung ber chu 2023 Australian Open kha ni tawhin second-round-a Mackenzie McDonald a hneh loh tum khan a inhliam.

Hei hi June thlaa zai a nih hmaa court-a a inlan hnuhnung ber niin World No. 1 hlui hi No. 672-ah daih a tawlh hnung zui a ni.

Nadal-a a inhnuhdawh tak avang hian kum 1999 hnuah Nadal emaw, Roger Federer emaw tel lova Australian Open khelh a nih hmasak ber a ni dawn ta a ni.