Badminton chauh khelhna atana duan, court paruk awm theihna tur, Zuangtui Indoor Stadium sak mek chu hna thawh tur 65% vel zawh tawh niin June thlaah sak zawh theih beisei a ni.

Aizawl Smart City Limited suma hall sak mek hi Zirtawpni tuk khan Sports Minister Lalnghinglova (Tetea) Hmar hovin Mizoram Badminton Association (MBA) hruaituten an tlawh.

Minister chuan sorkar hmasa hmalakna hi sawisel tur ni lovin, a ngaihhlut vanga en a nih thu a sawi a. National mai ni lo, international standard-a siam a pawimawh thu a sawi.

“Tournament lian pawh thleng thei tura buatsaih zel ni se, chu chuan thil tam tak keng telin tourism leh sumdawnna thleng pawhin nghawng tha a neih zel theih avangin chumi tur chuan a tul apiang um zui zel a pawimawh,” a ti.

MBA hruaitute pawh a chinchang hre ber tur leh a hmangaih bertu tur an nih avangin thil tih theih a nih laia theihtawp chhuah turin a chah a. Ruahmanna awm sa mek bakah camera control & editing room leh MBA office turte ruahman belh ni se an ti nghal.

MBA hruaitute hian hall ram chhunga mi mal in ni awm tak ding mekte an ngaimawh thu an sawi pawh Smart City hotuten a tul ang apiang an lo um zui tur thu an sawi.

Minister-in hall a en hi MBA hruaitute bakah Aizawl Smart City Limited CEO CC Lalchhuangkima leh a thawhpuiten an tawiawm.

MBA-in thuchhuah an siamah sports minister thahnemngaihnaah lawmawm an ti hle tih an tar lang a. Engkim inhawng leh phur taka en zui inhuam Smart City hotute leh a satu contractor chungah lawmthu an sawi bawk.

MBA hian Tetea hi Ningani khan a office chamber-ah hmuin Mizorama badminton-in hma a sawn zel theihna tura ruahmanna leh hmalakna kalpui mek te an sawipui a. Inddoor sak mek bakah hian Pullela Gopichand Intensive Training Centre, Ramhlun Indoor Stadium-a kalpui mek chungchang leh High Altitude Training Centre, Sihphira sak tur atana hma lak zel dan tur te pawh an sawipui.