Aizawl August 25, 2023: Vawiin khan Chief Minister Zoramthanga chuan Bairabi Civil Sub-Division thar, Kolasib district chu a hawng.

Chief Minister hian Bairabi SDO (Civil) Office Building thar leh Civil Sub Division thar lungphun a hawn hnuah a lawmna inkhawm hi NF Railway Platform ah buatsaih zui a ni a, K. Lalrinliana, Minister chu khualzahawm a ni.

Chief Minister chuan, hun rei tak an lo beisei tawh Civil SDO an neih tak avangin Bairabi mipuite lawmpuina a hlan a. Sawrkar hian hmasawnna hnaah pawh inrelbawlna lamah pawh ramin a mamawhte tihhlawhtlin zel a duh a ni, a ti. Tunah a thar mai a la nih avangin tihhmasawn zelna tur tam tak a la nei a, Office building lian tawk tak, a tul ang zela Department hrang hrang inbun ve theihna tur te, Quarters tha zawkte a mamawh dawn a ni, a ti bawk. 

R. Lalfakawma, Chairman, Jt. VC Bairabi in khawtlang aiawhin lawmthu a sawi a, Bairabi Civil SDO hi kum 2001 atanga an lo dil tawh thin thu a tarlang a ni. A lawmna inkhawmah hian Bairabi khawtlang hruaitute leh tlawmngai pawl aiawh ten thusawina hun an hmang a, khawtlang mipuite pawhin an hlut hle a ni.