Aizawl; Bairabi a tanga Sairang inkar relkawng (broad guage) siam hna chu Covid 19 hripui leng vangin hnathawh a khaihlak nasa a, hemi vang hian March, 2023 a zawh hman tur a ruahman niin, cheng Vbc. 5521 (anticipated) seng a zawh theih beisei a ni.

Railway consultant Hrangtawna IRTS (rtd) hnen atanga ZALEN thudawn danin, km 51.38 a thui Bairabi - Sairang relkawng siam hna hi Covid 19 hripui leng vanga hnathawh a khaihlak hnuah tun dinhmunah a pangngai angin hnathawh chhunzawm leh a ni tawh a, February 4 , 2021 khan North East Frontier (NF) Railway a an hotu HS. Yadav, CAO leh Vinod Kumar, Chief Engineer (construction)-te chuan hna kal mek dinhmun a hmun ah kal in an enfiah.

Hrangtawna sawi danin, Bairabi - Sairang relkawng siam hna hi chhan hrang hrang vangin zawh fel hun tur a ruahmanah zawh a lo ni tawh lo thin a, tun dinhmun a ruahmanna siam danah chuan March, 2023-ah zawh tum a ni.

Passenger phur rel darkar khatah km 100 a chakin a tlan thei dawn a, bungraw phur chu darkar khatah km 65 a ni thung ang. Lei lian siam tur (major bridges) 87 a awm dawn a, Lei sang (tall bridges) 6 awmin, station pali - Hortoki, Kawnpui, Mualkhang leh Sairang ah a awm ang.

Hnathawktu NF railway hotute chuan rel kawng laihin a paltlang tur ram neitute nena harsatna an tawhte chinfel chhung a rei avanga hnathawh tan lawk theih a nih loh avangte leh fur ruahtui tam avanga hnathawhna hun (working season) a tlem avangin hnathawh a chak thei lo tih an lo sawi tawh thin a ni.