Aizawl : Vawiin August ni 23, 2023 chawhma dar 9:30 am bawr vel khan Bairabi-Sairang rel kawng siam hna thawh meka Bridge No. 196, Sairang zero point bul a lei dawh lai chu a vanduaithlak takin a chim a ni. He chanchin buatsaih lai thleng hian ruang 18 lakchhuah tawh a ni.

Rang takin chhanchhuah hna thawh nghal a ni a. Aizawl DC leh SP te chuan a hmun thleng nghalin, District administration leh Police department te bakah department dang hotute chuan chhiattawhna hmun hi an pan nghal bawk a. QRT (Quick Response Team) leh NDRF (National Disaster Response Force) ten chhanchhuah hna an thawk nghal a, tun dinhmunah ruang 18 hmuh tawh niin, hliam tuar 3 chhanchhuah an ni bawk a. Chhanchhuah hna hi ngawrh taka chhunzawm zel a ni. Civil Hospital, Aizawl bakah Lengpui leh Sairang PHC te'n medical aid an pe bawk a ni.

QRT leh NDRF te chuan lei innghahna ban (bridge pillar) chhip atangin hnathawk pakhat chu an chhanchhuak a. QRT official pahnih - Lalhriatzuala leh Lalfakzuala te chuan he hnathawktu hliam tuar hi ban (metre 100 zet a sang) chhip atang hian an la thla a ni.

Chhiat tawh avanga nunna chan, an ruang lak chhuah tawhte chu ZMC leh Civil Hospital, Aizawl ah te post mortem kalpui a ni a. Ruang hi tawih theilo tura buatsaih (embalm) a nih hnu ah railway department hnenah an chenna khua theuh thlen turin hlan an ni ang.

Home Minister Lalchamliana chuan he thilthleng hi pawi a tih thu leh, nunna chan ta te chhungte chu a tawrhpui thu a sawi a ni.

Chhiattawhna hmun hi T.J. Lalnuntluanga, Transport Minister, C. Lalrosanga, MP, Lok Sabha, K. Laldawngliana, Tuirial MLA, Chief Secretary, DGP, Commissioner & Secretary, Home; Commissioner & Secretary, Transport; Director transport te, DMR Director leh official dang te'n an tlawh bawk a.

Tun dinhmunah chhanchhuah hna hi ngawrh taka thawh zui zel a ni a. Mizoram Police, BSF leh NDRF te thawk hovin theihtawp chhuah a ni.