Aizawl: Mizoram Sorkar leh Khawvel hmun hrang hranga Zofaten tanghovin Zo Kutpui an hmang chho mek a. Jampui Tlanga Zo Kutpui Mizoram CM hova hman a nih hnuah Feb.ni 11 & 12, 2020 hian Manipur Churachanpur-ah neih leh tura ruahman a ni.

He hunpui inpuahchah hian Manipura Zo Kutpui Organising Committee pawh vawi tam tak thukhawm tawhin Program pawh a duang fel tawh nia thudawn a niin Manipura Zofate zinga Ministers 3 leh Zo MLA 6 pawhin Zo Kutpuia an tel tur thu an tichiang tawh niin an sawi bawk.

Tunah hian Bangladesh a Zofate pawhin March 2020-a Zo Kutpui nei turin inbuatsaihna an kalpui mek bawk. Nimina Bangladesh-a Zo Kutpui neih dan tur chung changa inrawnrawnkhawmna neihah pawh hmun hrang hranga Zo Chipeng hrang hrangte an kal kim hle niin thulakna chuan a sawi a.

Myanmar Tahan khawpuiah pawh Zo Kutpui hi April 2020-a neih tum a nih bakah hmun dangah pawh neih zel a ni ang.