Tunkar khan State Level Bankers Committee (SLBC) Mizoram chu neih niin Sawrkar kum kalta 2019-20 chhung khan bank hrang hranga sum dahluh atanga loan anga pukchhuah tir thin credit-deposit ratio (CD Ratio) chu a hniam hle tih an Chairman leh Chief Secretary ni bawk chuan a sawichhuak a, loan pek chhuah lamah tan la turin Mizorama bank awmte a fuih bawk a ni.

Sawrkar kum 2019-20 chhung khan Mizoram a bank 26 awmah pawisa dahluh vaibelchhe 12,564 a nih laiin pawisa puk anga an pek chhuah chu vaibelchhe 4,947 leh tlem a ni a, CR ratio hi 39.38% chauh a ni a, a chhe hle a ni. CD Ratio hniam hian bank hrisel leh hrisel loh lantir bawk mahse bank sum lut zat atanga mipuia pawisa vir leh tur pawisa puk tir lama an hniam zia a lan tir avangin he thu hi ngaih thutak tur hle a ni ang. CD Ratio 60-75% nei thei bank hi hnathawk tha nia ngaih thin an ni tlangpui a, tuna a lan danah hi chuan state dang aiin kan hniam hle a ni. CD Ratio hi Mizoram pum bank chawlhruala lak a nih hmel a, bank ti tha an awm thei a, a ti tha loin an pawt hniam a ni thei bawk a, bank mal te te dinhmun hi enchian a ngai a, a ti tha lo te chu sawrkar bakah tlawmngai pawl ang pawha nasa taka nawr an ngai tih a chiang mai bawk a ni.

Bank te hian dinchhan an nei a, mipui pawisa dahluh atanga sumdawng an nih rualin an awmna hmuna mipuite pui tur an nih avangin pawisa puk tir hi a theih chinah an tih makmawh a ni a. Bank rawn in bun hi kan ram tan a that rualin mipui chanvo tur pawisa an puk chhuah tir leh bawk si loh chuan an awm chhan an thelh tihna a ni a, a bikin mi hnuai hnung zawkte dinchhuahna tur emaw, bul tan tur hmathlir nei tha te emaw sumdawng lian midangte hna siamsak thei te emaw an ngaih pawimawh a tul khawp ang. Tuna kan dinhmunah hi chuan hna nghet nei lo tan chuan pawisa puk hi a har hle niin a lang tlat a ni.

Tunah hripui leng vang hian kan ram chuan hun khirh tak a tawng mek a, sawrkarin sum a ngah loh avangin pawisa lengvel a tlem zel tura ngaih a ni a. Reserve Bank of India pawhin hei hi hriain bank te pawisa a puk chhuah tirna (repo-rate) chu a tihniam zauh zauh tawh a, a tum ber chu bank in loan a pekchhuah a neih theihna tur a ni a. Hei hian pawisa leng vel a tih tam deuh theih rin a ni a, chutiang anga a kal a nih chuan economy kal beuh beuh chu hmasawnna awm tir turin hmanraw pakhat a nih theih beisei a ni.

Hetiang hi kan dinhmun a nih laia sum dah luh ringawta sumdawng tum bank an awm a nih chuan a pawi hle thei a, Bank kawm deuh te hi kan ram hian an mamawh takzet em? tihte pawh rilrua dah a ngai hial tawh awm e. Eng pawh nise Sawrkar kum thar a kal mek a, bank te loan pekchhuah hi chik taka thlir zel a pawimawh ang.