ZALEN, November 16, 2025: Zirtawpnia Battle in Mizoram Super Fight Series 4-a a tumpuiin a hnekna hliam tuar lovin Lalruatdika, Hmunpui chu Pathianni zan khan a thi.

Ruatdika hi Grassroot Boxing Promotions leh Crown Boxing Promotions buatsaih, LPS Arena, Falkland, Aizawlah inhnekah hian Zirtawpni tlai khan Super Featherweight-ah Eric Lalthangkima nen an intum a. Round 3-na tan tirah a khingpui hian a kila nawr betin a chalah hnek fuh a, tluin nikhawhrelovin Greenwood Hospital, Bawngkawn panpui nghal ni.

A thluaka thisen zam lian a chat tih doctor-ten an hre nghal a, a thluak pawh a vung chu nasa hle a. Hmanhmawh taka zai nghalin ICU-ah dah a ni a, ventilator hmanga thawktir a ni bawk a. A dinhmunin that lam pan lovin Pathianni zan dar 09:20 khan a thi.

Kum 20 mi, Mizo boxer zinga hmabak nei êng ber pawl, Ruatdika hi LPS Pro Fight 2024-ah pawh bantamweight-ah semifinal thlengin professional huanga lut tura intuai hriam mek a ni a. Tun tum an inhnek pawh hi chumi kalkawng atana pawimawh tak a ni nghe nghe. 

A ruang hi Aizawla a chenna, Sakawrtuichhunah lak hmasak phawt niin an khua panpui zui nghal a ni a, Thawhtanni chhun dar 12:00-ah vui a ni ang.