BATTLE IN MIZORAM: Tawnhriat nei tha Mazhar-a hmachhawn tur Dinsanga’n inbuatsaihna tha nei lo

ZALEN, November 13, 2025: Mizoramin boxer intawh khawm lian a thleng dawn a, Zirtawpnia ‘Battle in Mizoram’-a inhnek 15 awm turah UAE atang leh India ram hmun hrang hranga boxer thate an inlan dawn a, an zingah hian Mizoram mai ni lo, Indian boxer langsar ber pawl ni mek, Laldinsanga’n tawnhriat nei tha, Mazhar Hussain a hmachhawn dawn a, inbuatsaihna duh ang tawk a nei lo tih a sawi.

Main Card-a inhnek hnuhnung berah hian Dinsanga leh Mazhar-a hi round 10 inhnek tura ruahman a ni a. Kum 33 mi, Mazhar-a hi kum 2018 atanga professional khel tan, vawi 12 inhnek tawha a tumpui vawi li a knockout nen vawi sarih hnehna chang tawh, vawi thum tlawma vawi khat hnehtawk nei a ni.

Mazhar-a hmaa ding tur, Dinsanga hi tun hnaia Mizoram Police-a lut, training mek a ni a, tlai lama exercise a lak bak a duh ang tawkin inbuatsaihna tha nei a nei lo tih a sawi a; mahse a fit tawk em em a, a inringtawk tih a sawi.

Kum 22 mi, Dinsanga hian nikum November khan Bengaluru-ah tho Ghanaian boxer Michael Decardi Nelson hnehin WBC Youth bantamweight world title a hlawh chhuak a. A hnuah professional-ah vawi thum hnek leh tawhin a chak vek a, a inhnek hnuhnung ber chu May 25 kha niin GuiMing Li a hneh.

Farkawn tlangval hi Indian boxer zinga record neih tha ber pawl niin vawi 12 a inhnek tawhah chak vekin heng zinga vawi sarihah hian a tumpuite a knockout a ni.

Mazhar-a hi a inhnek hnuhnung ber hi April 25 kha niin Bengaluru, Karnataka-ah Sharwan Das lakah a tlawm a. A hmachhawn tur chu boxer tha tak a ni a tih a hriat rualin amah ngei pawh boxer tha tak a nih a, boxing a khel rei tawh a, tha takin a inhnek thei dawn tih a sawi.

Featherweight-ah F Zoramchhana’n Uttar Pradesh boxer Brijesh Kumar a hmachhawn dawn a, kumtluanin a inbuatsaih a, nasa zawkin a theihna a lantir dawn tih a sawi.

WBC India kawnghren kawl lai, Cherhlun tlangval kum 26 mi hi vawi 14 a inhnek tawha vawi 11 chak, a inhnek hnuhnung vawi ruka chak vek a ni mek a. berah September thla khan Vikram Singh Jestha lakak unanimous decision-in hnehna a chang.

Brijesh-a hi professional-a vawi li a inlanna tur niin chak a la nei lo va, a inhnek hnuhnung berah kar hmasa mai khan Shivam Sharma nen New Delhi-ah an inhnehtawk thung.

Super lightweight-ah Vanlalawmpuia (Awp-a) leh Maninder Singh an inhnek dawn bawk a, round riat tura ruahman a ni a. Mizo zinga professional boxing khel hnem ber, Awpa hian a hma aia thiamna tha zawk lantir thei turin a inbuatsaih tih a sawi a, vawi 18 a inhnekna tur niin a tum 14 nan chak ngei a inringtawk.

A beih tur, Punjabi fighter Maninder erawh tum riat inhnek tawhin vawi li a chak a ni a. Kum 22 mi niin knockout pali a nei a, a inhnek hnuhnung berah Bharany Velmurugan chu June thla khan TKO-in a hneh.

Hmeichhe inhnek tum khat awm turin ngaihven a hlawh dawn a. Haryana boxer, Renu Phogat-i leh Dubai atanga inlan tur, Nastaran Fathi te Super Bantamweight huangah an inhnek dawn.

Kum 34 mi, Nastaran-i hi Iranian niin Dubai-a inbengbel a ni a, vawi 14 a inhnek tawha vawi khat chiah la tlawm a ni a, a inhnek hnuhnung berah February thla khan Victoria Torres Canul lakah hnehna a chang a. A hmachhawn tur, Rohtak atanga inlan tur hi kum 26 mi niin a inhnek hnuhnung bera chak lo a ni.

Inhnek vawi 15 a awm dawn a, middleweiht-ah LPS Pro Fight champion F Lalthanliana Junior leh Arnab Chirua (Assam), lightweight-ah HC Lalramfela leh Lalruatfela Zote, C Lalhruaitluanga leh Jeckson Meitei (Manipur), super featherweight-ah Omega Lalramdina leh Aman Ali (Assam) an intawng dawn.

Boxer 30 inlan tur zingah Mizo 21 an tel dawn a, Aidu Plap App atangin live-in a en theih dawn a, a hmunah en man awm lovin a en theih bawk ang.

PRELIMINARY BOUT:

04:00 PM Stephen Lalrindika vs N.Lalhruaizela (Super Featherweight)

04:20 PM Lalhmingdailova vs Barun Kumar Roy (Bantamweight)

04:40 PM Lalpekhlua vs Moses Lalnunfela (Super Featherweight)

05:00 PM Lalruatdika vs Eric Lalthangkima (Super Featherweight)

05:20 PM Ngurbiakhlua Hauzel vs Lalruatzela Hauzel (Light Heavyweight)

05:40 PM J.Lalsiammawia vs C.Lalhruaitluanga (Lightweight)

06:00 PM Malsawmtluanga vs Vanlalenkawltira (Super Flyweight)

MAIN CARD:

06:20 PM Aman Ali vs Omega Lalramdina (Super Featherweight)

06:50 PM Khongbantabam Jeckson Meitei vs C.Lalhruaitluanga (Middleweight)