Aizawl; Aizawl Municipal Corporation (AMC) ruahmanna angin, April 2022 atangin Aizawl khawpuiah bawlhhlawh paih man mipuiin an chawi thin chu tihpun a ni dawn a,  hemi vang hian mipui nawlpuiin thla 1 a bawlhlawh paih man Rs. 50 an chawi thin chu Rs. 100/- a nih tawh rin niin, dawr, workshop, hotel etc. te bawlhlawh paih man pawh tihsan a ni ang.

Aizawl mayor Lalrinenga Sailo hnen atanga ZALEN thudawn danin, AMC-in bawlhlawh paih motor hire-na senso 80% tum in, mipui lamin Local Council kaltlangin 20% an tum thin a. Chu chu kum 2012 atanga lo kalpui tawh niin, tun dinhmun ah oil, motor hire na leh thil hrang hrang man sang zel ah PPP mode kalpuina sharing pattern 80:20 chu April, 2022 atangin 60:40 ni tawh turin AMC chuan ruahmanna a siam a ni.

Aizawl mipuiin bawlhlawh paihna man an chawi chu veng hrang hrangah tih dan inang lo mah se, a tlangpuiin thla 1 atan chhungkaw 1 zel ah Rs. 50 Local Council lamin an khawn tlangpui tih Aizawl mayor chuan sawiin, dawrkai, workshop, hotel etc. ah erawh chu aia tam chu khawn a ni thin tih a sawi.

"AMC Board of Councillors thukhawm ruahmanna anga bawlhlawh paih motor hire-na senso 60:40 a nih tawh dawn vangin, mipui ten bawlhlawh paih man an chawi thin chu a letin a pung turah kan ngai a, mipui atanga contribution a pun chuan motor hire na man pawh min phuhruk turah kan ngai," Aizawl mayor chuan a ti.

Tuiriala bawlhhlawh sawngbawlna hmun Solid Waste Management Center ah nitin bawlhlawh paih motor 180 vel kal ziah ang niin, rate thar ber anga chhutin AMC-in bawlhlawh paih motor hire na atan kum khatah Rs. 73,434,720/- vel a seng a, mipui lamin Rs. 1,83,58,680/- seng anga chhut a ni.
    Hetihlai hian Aizawl Municipal Corporation (AMC) in Waste Management Centre a enkawl hnuah bawlhhlawh hman nawn theih (recyclable waste) 5.85 metric tonne vel a thawn chhuak tawh.

AMC a Solid Waste Manegement changtu Laltlanzova Khiangte sawi danin AMC-in January 20, 2022 atanga Waste Management Centre enkawl hna SIPMIU kut atanga a lak hnuah nasa taka hmalak a ni a. Bawlhhlawh hlawm chi khat, bawlhhlawh hman nawn theih 'Recyclable Waste' te chu phai lama a thlen thlak duak theih dan leh sum lakluhna atana hmam dan tur ruahman a ni a. Waste Centre chhungah Waste Dealer 13 dah a ni a, bawlhhlawh hman nawn theih thliara lakhawmtu Rag Picker 157 an awm bawk a. Aizawl veng 83-a bawlhhlawh paih motor 150 Driver ten bawlhhlawh hman nawn theih hi Dealer te hnenah an hralh ve reng bawk a. Hemi system ah hian AMC in Dealer te hnen atangin chhiah tlem a zawng a la niin a sawi.