Aizawl: SIPMIU-in Tuirial bula Aizawl khawpui bawlhhlawh sawngbawlna hmun thar ‘New Engineered Sanitary Landfill’ an siam chu October 2019-ah chuan hman tan tum a ni a. Bawlhhlawh sawngbawlna hmun thar hi peih la ni lo mah se AMC chuan bawlhhlawh thliar hran hna chu August thla tir atang khan an kalpui tan.

SIPMIU thawktute chuan New Engineered Sanitary Landfill siam hna chu August, 2016 atanga thawh tan a niin thla 30 chhunga zawh hman tur a ni tih Zalen palai an hrilh a. Mahse zawh hun tura huntiam February 17,2019 ah contractor hian 73% chauh a la thawh avangin ni 45 chhung hun pawhsei a dil a. SIPMIU chuan October, 2019 atang chuan helai hnathawh hi zo ngei ngei tur leh hun pawhsei a nih tawh dawn loh thu an hrilh a ni.

New Engineered Sanitary Landfill-ah hian ruahman dan chuan ni tin changpat leitha ton 22 siam tum a ni a. Mi thiamte chhut danin Aizawl khawpui ni tina bawlhhlawh paih zat chu metric ton 160 niin ni tina mi pakhatin bawlhhlawh a neih chu 495 grams anga chhut a ni. Bawlhhawlh paihna tharah hian tunlai thiamna hmangin bawlhhlawhte hi thliar hran vek tum a ni.

Bawlhhlawh sawngbawlna hmun thar hi hman theih la ni lo mah se Aizawl Municipal Corporation (AMC) chuan August thla atang khan bawlhhlawh thliar hran hna a thawk tan.

AMC Commissioner Dr. H.Lalthlangliana chuan, “Local Council la inpeih chiah lo veng tih lohah chuan bawlhhlawh thliar hran hna hi kan kalpui vek a. Tuna kan paihna dumping ground-ah hian tawih thei, tawih thei lo leh plastic te kan dah hrang a, kan bawlhhlawh te pawh leitu an awm ve tawh a ni,” a ti.

AMC Commissioner chuan plastic khap chungchangah mipuite zirtirna (awareness) chu an kalpui reng tih Zalen palai a hrilh a. “Aizawl kawt-chhuahah duty insiamin lirthei lut tura plastic-te kan laksak a. Kan staff-te pawh dawr hrang hrangah kal kualin khap a nih thu an hrilh a. August 26, 2019 hnuah chuan a zuar leh kawlte chu kan lakkhawm sak tawh dawn a ni,” a ti.

AMC Commissioner chuan hun remchang hmasa berah plastic thlakna siamhote tan Millennium Centre-ah exhibition cum sale buatsaih an tum tih a sawi bawk.