Aizawl December 23, 2022: Kumthar atangin Aizawl Municipal Corporation (AMC) chuan bawlhhlawh tawih theih paih dan kalphung an thlak danglam tawh dawn a, sarang a fun tawh lovin bawlhhlawh phur motor-ah chhun zel tawh tur a ni.

AMC chuan tun hnai khan bawlhhlawh tawih thei khawn khawmna tur Steel Container a semchhuak a, hetah hian chhunkhawm zel tur a ni. Bawlhhlawh tawihthei paih hian sarang/polythene a fun thin a ni a, tawihthei zingah a funna sarang tawih theilo tam tak a tel thin avangin a sawngbawlna kawngah harsatna an tawk a, hemi tirehna tur hian tuna ruahmanna thar hi an siam ta a ni.

Solid Waste Management Rules, 2016 chuan India rama khawpui te chu tawihthei (wet) tawihthei lo (dry), Plastic leh E-Waste & Hazardous a thendarh turin India ram khawpui zawng zawng a phut a, hemi kawng hmalakna hi National Green Tribunal (NGT) chuan uluk takin a vil a, hemi kawnga hmala tha lo te chu pawisa chawi tirin hremna a pe a, Mizoram erawh hremna tuarlo state te zingah a la tel thu AMC lam chuan an sawi bawk a ni.