July 20, 2022; Aizawl Municipal Corporation (AMC) huam chhung a bawlhlawh phur motor te chu tha taka an bawlhlawh khuh turin hriattir an ni a, kawng dunga leivung thlauh man te chu dan anga hrem theih an ni.

Hemi chungchangah hian Municipal Commissioner (AMC) chuan hriattirna a lo chhuah tawh a, chuta tarlan a nih dan chuan, Solid Waste Management Bye Laws, 2019 Sec­tion 10.1 leh 10.3 in a sawi angin, bawlhhlawh senghawina motor-in bawlhhlawh a phurh laiin tha taka bawlhhlawh khuh tur a ni. AMC in bawlhhlawh paihna hmun a ruat Solid Waste Management Centre (SWMC) thlen hma loh chuan bawlhhlawh khuhna hawn emaw bawlhhlawh theh/hlan thlak phal a ni lo. 

Municipal Commissioner chuan motor-a leivung paihtu ten kawng dungah leivung an thlauh thin tih hriat a ni tih tarlang bawkin, chu chuan pollution siamin, vantlang tan harsatnaa thlen nasa hle tih a tarlang a, kawng dunga leivung thlauh man te chu 'The Mizoram Municipalities Act, 2007' leh 'The Solid Waste Management Bye-Laws, 2019' hmangin an chungah action lak a nih tur thu a tarlang bawk.