Aizawl December 29, 2022: UD&PA Department hmalakna in vawiin khan Mizoram-a District Headquarters leh Urban towns-a bawlhhlawh sawngbawlna chungchang sawihona neih a ni a, Solid Waste Management Centre (SWMC) la awm loh naah a rang thei ang ber din a tul tih an sawi.

Meeting kaihruaitu Lalmalsawma Pachuau, UD&PA Secretary chuan, Mizoram chu National Green Tribunal in State tam zawk te an bawlhhlawh sawngbawl dan fel tawk lo avanga pawisa tam tak a chawitir laiin Mizoram fine chawitir kan ni ve lo tih a sawi a. Chutih rualin District Headquarters leh Urban Towns dang Solid Waste Management Centre la awm loh naah a rang thei bera din a tul thu leh funding source pawn Planning Department nena tangkawpin ngaihtuah mek a nih thu a sawi.

Bawlhhlawh sawngbawl nana sum sen ngai tam lutuk thin tih ziaawm nan decentralized waste management zulzuiin, hmun khatah chauh ni lo khaw chhung hmun hrang hrangah sawngbawlna hmun siam dan rang taka ngaihtuah nise tiin an rel a, DC ten an District theuha bawlhhlawh an generate zat leh eng ang bawlhhlawh nge an generate tih lo zirchiang se, bawlhhlawh tawih thei (wet waste) te chu a tam thei ang ber Home Composting leh Community Composting hmanga lei tha siam nana hman nise tiin rel a ni bawk a, hemi tur hian Department dang te nena mumal taka thawhho dan ruahman nise tia rel a ni bawk.

UD&PA Directorate-a Meeting neih hi Lalmalsawma Pachuau, Secretary, UD&PA in a kaihruai a, H. Lianzela, Director, UD&PA ; Lalrothanga, Project Director, SiPMlU ; CC Lalchhuangkima, DC Khawzawl leh Saitual, Khawzawl, Serchhip, Mamit leh Hnahthial District DC aiawh te leh UD&PA Department officer te an tel a ni.