Aizawl January 29, 2024 : Mizo Zirlai Pawl (MZP) General Headquarters, Aizawl chuan vawiin khan Chief Minister Lalduhoma chu a pisa ah an hmu a, Free Movement Regime (FMR), Border Fencing leh NIT Mizoram chungchang te an sawipui a ni.

MZP chuan FMR thiah tumna leh Border fencing hung tumna awm hi theihtawp chhuah a dodal tlat an tum thu leh a tawp thlenga an hmalakna thlawp zel turin CM hi an ngen a ni. CM Lalduhoma chuan, Prime Minister leh Union Home Minister te hnenah FMR thiah tumna leh Border fencing hung tumna awm chu a duh loh thu a thlen tawh thu MZP hruaitute hi a lo hrilh.

Chief Minister hi NIT Mizoram chungchang pawh sawipuiin, CM chuan, a rang thei ang bera hmalak a tum thu leh NIT Chairman nen pawh an inbiak tawh thu MZP hruaitute hnenah hian a sawi.

MZP chuan, Commerce & Industries Deptt. leh Aizawl Smart City Ltd. hnuaia chhungkaw sang chuang eizawn theihna tur Bazarpui Building sak mek te enfiahin, hnathawh muang lutuk bakah hna zawh hun tura hun ruat kumin January leh June thla chhunga zawh a nih loh tur chhan hrang hrang te an endik a.

MZP hruaitute chuan bazar building sak mek hi tun aia chak zawka thawk turin a hrilh a, mipuite’n a rang lama an hman theih tura hawn a nih theih nana hna thawk turin hnathawktute an hriattir bawk.

Hna chak zawka thawh a nih theih nan, Sawrkar thuneitute pawh hnahthawktute bill a rang lama tihchhuah sak thin turin a ngen nghal bawk a. MZP chuan Bazar building sak hna thawh mek hi zawh a nih hma chuan an vil zui zel tur thu an sawi.