Aizawl: Mizoram sawrkar chuan Aizawl bazarpui New Market building hlui bera awmte chu a him loh avangin sawn chhuak turin hma a la mek a, hemi bawhzuina atan hian nimin zing khan Commerce & Industries Minister Dr. R.Lalthangliana chuan new market hi a tlawh.
Sawrkar team leh Bazar sumdawng pawl hruaitute chu Commerce & Industries Site Office-ah an inkawm hmasa a, inpawh-tlang takin thil awmzia sawiho a ni a. He hunah hian Commerce & Industries Minister Dr. R.Lalthangliana chuan sawrkar chuan ngun taka thil a ngaihtuah hmasak thu leh tuna sawrkar thuchhuahte pawh kan zavaia himna tur leh a kawng awmchhun nia hriat a nih thu a sawi a. Chhungkaw sang tel tehmeuh sumdawnna a khaihlak hret tur chu thil hriat hrehawm tak a nih rualin chhiatna lian zawk, nunna tam tak hloh theih-na pumpelhna tur kawng a ni tih hrethiam turin sumdawngte pawl hrang hrang hruaitute chu a ngen a ni.
Bazar sumdawngte pawhin an harsatna te, Bazar chhunga an eizawnnate chu chhungkaw innghahna ber a nih thu te leh sawrkarin building thar a sak hunah seat an chan tawh loh mai te an hlauthawng bawk tih an sawi a. Minister chuan seat chan loh chu thil hlauhthawn awm a ni loh thu sawiin, “Bazar building hluia seat nei zingah duhthua an sumdawnna tihtawp duh te an awm a nih ngawt loh chuan tuna seat nei te hian an neih leh ngei sawrkarin a duhsak a ni”, a ti.
Sawrkar aiawh leh sumdawng pawl hrang hrang hruaitute inkawmnah hian Commerce & Industries Director J. Hmingthanmawia leh PWD Buildings Chief Engineer Bowman ten report tawi an pe a. Report-a tarlan dan chuan Bazar building lian ber hi kum 1987 khan Roorke College of Engineering ten Drawing leh Design an siam anga sak a ni a. A building hmanrua cement leh balu te hi a tha chi hman ni se tunah pawh la hlauhawm lo tura ngaih a ni a. Mahse, tunah chuan building chhuat pawp lian tak tak hmun thenkhatah awm tawhin a ban leh a beam tuamna concrete mix te hmun tamtak a tla filh deuh vek tawh a, rod a tuam tawh miah loh te pawh a awm.
Aizawl District Disaster Management Authority Team chuan kum 2015 leh 2017-ah te khan Bazar building hluia sumdawngte chu chhuak tura lehkha pek an lo ni tawh a ni. Zirtawpni khan sawrkar chuan a vawi 3-na atan chhuak tura tihna thupek chu sumdawngte hi a pe leh a. Eviction Notice-a inziak ang chuan June 21, 2019 atanga chhiara thla khat ral hma ngeia chhuak turin helai hmuna sumdawngte hi hriat tir an ni.
Tun dinhmunah Bazar building hluiah hian sumdawng thu nghet mi 1073 in thutna/dawr an nei mek a; engemaw changa rawn inzuar te nen mi 2000 chuang sumdawng thu thin anga ngaih a ni.