Aizawl; Aizawl New Market main building (Aizawl City Centre) sak hna chu tan a ni dawn hnai a, chawhmeh zuarte an insuanchhuak tawh a, vawiin ah hulhliap zarte thiah hman a nih rin a ni, hnathawhna hmun tur chinte hung fel a ni tawh bawk a, a rang lamin hna thawh tan a ni dawn.

ZALEN thudawn danin, Aizawl City Centre sakna lai turah hian chawhmeh zuar thahnemtak an thu thin a, chungte chu November ni 16 atang khan an insawnchhuak a, hemi ni vekah hian hnathawhna tur huamchin rangva hmanga hung fel nghal a ni. Vawiin lamah bazar thu ten anmahni sum senga an lo sak, hulhliap te chu thiah hman a nih beisei niin, chawhmeh zuarte hi Aizawl khawpui chhung hmun remchang laiah an insawn chhuak nia hriat a ni.  

Tarlan tawh angin, Aizawl Bazarpui a 'Aizawl City Centre' sakna atan Rs. vbc. 42.82 dah niin, Smart City Mission atanga sum hmuh a ni. Project hming chu 'Modernisation of Bara Bazaar - Trade Facility - cum-Exhibition Area' tih a ni a, design siam turin intihsiakna buatsaih a ni a, Catalyst Architecture thlan a ni a, contractor tur chu UD&PA in restricted tender hmanga an thlan Lushai Engineers an ni.

Aizawl City Centre building sak tur chu block hnih ah then a ni a. A hnuai ber parking leh cold storage a hman tur niin, parking ah 2 wheeler 79 leh 4 wheeler 31 a leng thei dawn. Block A chu chhawng 7 tur niin, dawr 458 a awm ang. Block B ah dawr 647 a awm ang a, chhawng 5 a sak tur a ni.