ZALEN November 2, 2025: Directorate of Health Services hnuaia Food & Drugs Administration (FDA) Wing thawktute chuan tunlai hian beautician parlour thenkhata biang, hnar leh hmui bawr tihmarna hmang an awm tih sawiin chutianga inkhawihtirte zinga manganga doctor pan leh ta ruai an awm nual niin an sawi.

ZALEN-in FDA thawktute hnen atanga thu a dawn danin tunlai hian cosmetology tih tawngkam a lar hle a, medical cosmetology a awm a, chu chu beautician pangngai nen a inang lo a ni.

Chal chuar leh mit vun tihmar nan botox treatment an ti thin a; biang, hnar leh hmui bawr tihmarna dermal filler an ti bawk thin.

Heng treatment-te hi medical cosmetologist hna a ni a, beautician parlour thenkhat hetiang inenkawlna kalpui an awm thu leh chutianga inkhawihtirte zinga mangang doctor pan leh ta ruai an awm thu report an dawn thu FDA lam chuan an sawi a, tunah hian an zir chiang zel a, cosmetics drive ngawrh lutuk lova neih ni tawhin, “Nasa taka hma lak a la tum a ni,” an ti.

FDA thawktute chuan lan nalh, lan mawi leh hrisel theihna tur lam hawi damdawi, cosmetics leh food supplements fakna uchuak social media lamah hmuh tur a tam hle a. Heng fakna (advertisement) tawngkam, thuziak leh video clip-te hi FDA chuan chik takin a zirchiang thin a, dan hrang hrang Drugs Rules, 1945, Drugs & Magic Remedies (Objectionable Advertisements) Act, 1954, Cosmetics Rules, 2020 leh Food Safety & Standards Act, 2006 & Rules, 2011 kalh deuh vek an ni a, “Dan anga thubuai siamsak an nih chuan advertisement him lo siama thehdarhtu chu na taka hrem theih an ni,” an ti.

Damdawi fakna lam hi FDA chuan hmalakna hmasaa a neih thin a ni a, danin a duh loh tak mai, doctor rawn hauh lova damdawi hmanna ‘self medication’ a hrinchhuah avangin a pawi a. Mite ei ang ei ve mai hreh lo atang hian tuten emaw an lo fak tlawr ta chiam mai thin hi a pawi thin hle a ni. 

FDA lam chuan, "Thenkhat chuan sumdawnna rilru pu tak maiin an fak a, hralh pawh an hralh tha hle. Thenkhat erawh chuan an dampui nia an hriat avangin midang duhsak vena rilru puin an fak thung a. Mihring an inang vek lo va, damdawiin mimal taksa a zuk khawih theih dan leh taksain damdawi a lo dawnsawn theih dan mi zawng zawngah a inan vek loh avangin, mi pakhat dampui kha midangin an dampui ve kher lo thei a. Chuvangin, midangte duhsak zawnga damdawi fak hi a him chuang lo va, ti lo turin kan inngen zawk a ni," an ti bawk.

Taksa lan mawina chungchangah FDA thawktute chuan, "Cosmetics hmuh theih tam zawkte hi ramdang siam, dan lova lak luh an ni tlangpui a, Standard Quality Cosmetics an ni em tih pawh sawi theih a ni lo a. Tute emaw vawrh lar chiam avanga cosmetics hman lar takte pawh, an label inziak atanga en chuan company tha tak siam an ni vek lo tih an sawi a. Food/Nutritional Supplement-te pawh hi quality tha an ni lo ve tihna lam ni lovin, sumdawnna thil a ni tel tih kan hriat ngei ngei a ngai a, a zuartute chuan an fak lo thei lo."

"Hriselna thuah doctor rawn lova mite fakna atanga ei/hman kan tan ve ta mai thin hi a pawi lai tak a ni a. Insawiselna kan neih hran lohva, chaw pangngai taka eia in kan nih chuan supplement lovin kan awm thei reng a, kan hriselna a pan deuh nia kan hriat chuan doctor rawn mai ila, kan mamawh nia an hriat min lo chawh angte ei mai hi a him ber a ni," an ti. 

FDA thawk te chuan hun engemaw chen atang khan mi thenkhat ten ngona, thauna, cherna, sanna, vun marna leh a dang an thehlar a, heng fakna hian rilru a hruai hma hle a. Ngaihven peih deuh tan chuan hetiang (glutathione/collagen/antioxidant) te hi company siamchhuah man to tak taka insengso lo zawng hian a awm theih a, man tlawm te tea lei mai theihin chawhmeh/thlai dawrah an tam a ni. Taksa a lo mawi theih tak tak nan chuan lifestyle vawn uluk a pawimawh ber zawk tih an sawi bawk.