French Open khelh meka rilru lam damlohna nasa tak a neih avanga inhnukdawk ta, chanchin ngah tak, Japanese tenis star,  Naomi Osaka hi October 16, 1997 khan  Chūō-ku, Osaka, Japan-ah a piang a. A nu hi Japanese a ni a, a pa hi Jacmel, Haiti lam mi a ni thung.

Osaka-i hi Women’s Tennis Association (WTA) ranking-ah No. 1 pawh a lo ni tawh a, Asian zinga hetiang dinhmun sang luah thei hmasa ber a ni.

Tennis inelna lian, Grand Slam-ah pawh maltanah vawi li a lo champion tawh a, US Open leh Australian Open champion lai a ni mek nghe nghe.

WTA Tour-ah vawi sarih a champion tawh a, heng zingah hian Premier Mandatory level-a vawi hnih a champion pawh a tel.

2018 US Open leh 2019 Australian Open-ah khan Osaka hi champion-in Grand Slam maltana a champion hmasak pahnih niin Grand Slam zawnin a champion tihna a ni a, kum 2001-a Jennifer Capriati-i hnua Grand Slam zawna champion leh hmasa ber a ni a. Kum 2015-a Serena Williams hnua champion zawn hmasa ber a ni bawk.

Haitian pa leh Japanese nu laka piang ni mah se Osaka hi kum thum lek a nih atangin United States-a inkhelh zir a ni a. Kum 16 a nihin US Open champion hlui, Samantha Stosur chu WTA Tour-a a inlan hmasak ber, 2014 Stanford Classic khan hnehin hriat a hlawh tan.

Kum hnih hnuah Japan-ah WTA final hmasa ber, 2016 Pan Pacific Open khan thlengin WTA ranking-ah a sang 50 zingah a tel tan.

Kum 2018 khan Indian Wells Open-ah WTA title hmasa ber a la ta a. A hnu kumah Grand Slam maltana vawi 23 zet champion ni tawh, Serena Williams chu US Open final-ah hnehin Japanese player zingah Grand Slam maltana champion hmasa ber a ni a. Kum 2018 atang khan Grand Slam maltanah kum li chhungin a champion ta zel a ni.

Osaka hi khawvel huapa infiam mi zinga hralh tla ber zinga mi a ni a, kum 2020-ah khan fakna leh sponsor atanga sum la lut tam ber pariatna a ni a. Hemi kum hian hmeichhe zinga sum la lut tam ber a ni nghe nghe.

French Open khelh mekah chanchinbumi a kawm duh lo va, sawisel a hlawh hnuah amah ngeiin rilru lama harsatna a neih avangin a khel tawh dawn lo tih a puang.