Khawvela football inelna a sanna ber anga sawi theih, Europe khawmualpuia football club-ten thlasik chhunga player an lei leh an hralh theih hun an hawn meka hming langsar ber tia sawi ngam, Dušan Vlahović hi Serbian professional footballer niin tunah chuan Serie A club hlun, Juventus-ah a khel mek a, Serbia national team tan pawha thawhhlawk tak a ni.

Belgrade khawpuia January 28, 2000-a piang, Vlahović-a hian Altina Zemun football school atangin bul a tan a, hetih hun lai pawh hian a thiam fu tawh a ni ang, a aia upa zingah hlir a khel thin.

A hnuah OFK Beograd-ah kalin thla thum chhung chauh a khel hman thung a. An ram club lian, Red Star Belgrade tan pawh vawi khat inlan hmanin kum 2014 nipui lai khan Partizan Belgrade a zawmsan ta thung.

Vlahović-a hian puitling a nih china a football nun chu Partizan-ah hian a tan tih theih a ni a, senior team tan a vawi khat nan kum 2016 khan a inlan a. League-ah champion-puiin Serbian Cup vawi hnih a lakpui bawk.

A thatna hmu fuhin football ram lian zawk, Italy-a Fiorentina chuan kum 2018 khan an la lut a, a che tha bawk a, 2020-21 season khan Serie A Best Young Player atan an thlang a, league-ah pawh goal 21 zet a thun a ni.

Tun thlasik bazarah hian anni aia lian zawk, Arsenal pawhin lak luh tumin an bei ngar ngar a, amah pawhin chhuah a duh a; mahse, London club erawh pan a duh lo va. Rei tak titi a awm hnuah tun hnai mai khan Italy club lian ber zinga mi, Juventus chu a awm fel ta a ni.

Serbia ram tan pawh Vlahović-a hi a tangkai hle a, youth level atanga ram tana inlan tanin kum 2020 khan UEFA Nations League-ah senior team tan a vawi khat nan a inlan ve ta a. 2022 FIFA World Cup qualification-ah goal lo thunin tournament-ah hian inlan turin an tling tawh nghe nghe.

Vlahović-a hi football lam hriate chuan an fak hle thin a, striker-in neih a mamawhte a nei vek nia sawiin ‘complete striker’ an ti thin a. A lianin a chak tha a, a thiam em em bawk a, goal a hre em em bawk tia sawi thin a ni a. Goal bulhnaiah a hlauhawm lehzual a, Fiorentina tana a khelh chhunga Serie A-a a goal thun 44 zinga 41 zet chu penalty area chhung atanga a thun a ni a, goal bulah a hlauhawm a. Mi dangte pek mai theih turin awmna tur remchang a hria (a positioning a tha) tia fak hlawh thin a ni.