Aizawl August 18, 2024 : Nimin khan EFCI Mission veng, Saiphai kohhranin hall tura an sak mekah Vai mistiri Jafar Muhammod Mustafa (35) s/o Jonul Hoque Barbhuiya, Sonabarighat chu a chung atanga tla thlain , a hmunah a boral.

Vai mistiri accident hi Sonabarighat lam mi a ni a, amah hi head mistiri a ni. Nimin nilenga ruah a sur avangin hna an thawk lo va. Amah hi an in atanga lo thleng hlim, an hnathawh dan vel ruahmanna siam tura Hall chunga han lawn chho a ni. (A chung structure siam zawh niin rangva la chih zawh loh deuh a ni). A tlakna hi ft 30 vela sang a ni a, tual char PCC Flooring a tla a nih avangin a hliam na ta deuh a ni. A malpui ruh pahnih a tliak bakah a lu lamah hliam a tuar bawk a ni.

A chhungte hrilh hriat niin, a ruang hlawm turin an rawn kal a. Saiphai South Branch YMA ten kuang an siamsak a, a ruang phurhna tur motor hi Kohhran lamin an buaipui a ni. Mission veng EFCI Kohhran leh mitthi chhungte inkarah eng mah harsatna a awm lo va, a hnu-ah pawh sawi buai awm lo turin intiamna Police-te hmaah ziahpui an nih hnu-in, a ruang hi thlah liam a ni.