Aizawl July 19, 2023 : Vawiin khan ZPM Campaign Committee chuan thuthar lakhawmtute an kawm a, ZPM leader Lalduhoma chuan 2023 Inthlanpuia an party candidate te chu an tha tawk tih a sawi a, mihring tak chuan an inring tawh tih a sawi. Bial 40 chauh a awm avangin bial chang lo a awm theih thu leh bial 40 dang pawh la awm se tuna an candidate ang tluk tur an la nei, a ti.

Party chhunga candidate chang leh chang lo chungchang zawhna a chhan naah Lalduhoma chuan Nomination Committe thutlukna a ni, a ti a, party-ah mi tha tak tak an awm a, Office Bearer nih vanga candidate chan ngawt theih a nih loh thu a sawi. Party-ah mi tha tak tak an tam avangin bial 40 chu inchan ngaihna a awm tawh loh thu a sawi. ZPM Leader chuan,  "Bial 40 dang pawh la awm se tuna kan candidate ang tluk tur kan la nei-ah kan inngai," a ti.

Lalduhoma chuan, "Tuna inthlan kan hmachhawn turah hian party pahnih, sum ngah tak mai kan hmachhawn dawn a, mihring tak chuan a huphurhawm hle. Congress unau te pawh an lo la hausa viau tih kan hria a, kan candidate tur pawh hi nuai 100 telin an thlem a ni. MNF lam pawh 2018 inthlan khan Delhi atangin sum tam takin an pui tih kan hria a, tun tumah pawh hian Delhi sum an hmachhuan leh ngei turah kan ngai. New Delhi-a NDA meeting-ah kan MP Pu Lalrosanga a tel a, awmzia nei turah kan ngai," a ti.

ZPM Leader chuan tun hnai inthlan enin sum thil tih theihna a tlahniam niin a lang a ti a, Serchhip-a MLA bye Election te, Lunglei Municipal Council inthlanah leh Zemabawk Local Council inthlan te enin sum thil tih theihna thi ta nia ngaih theih anih avangin lawmawm a tih thu a sawi.

Lalduhoma chuan Manipur chungchangah ZPM chuan dinna nghet an nei tih a sawi a, Manipur chu Meitei te ram bik a nih loh thu leh tuna an buaina ngaihtuah chuan tlang rama awm te leh phai-a awm te chu administration nei hrang se an duh tih a sawi. Greater Mizoram ai chuan re-unification lam chu an dinna a nih thu a sawi a, nawrtu nih an tum loh thu leh an rawn bel a nih chuan lawm taka an lo pawm tur thu a sawi bawk.

ZPM Campaign Committee Co-Chairman K. Sapdanga chuan UCC chungchangah dinna nghet an nei, a ti a, 22nd Law Commission of India-ah pawh an duh lohna hi an thlen tawh thu leh Mizo Kristian te chu hmarchhakah pawh a tuar nasa ber tur an nih thu a sawi a, a chhan chu Missionary tir chhuak hnem ber a nih vang a ni, a ti.