Aizawl August 18, 2023: Vawiin khan MNF President & Chief Minister Zoramthanga chuan Mizo Hnam Run inkhawmah mi thar lawm lutin thu a sawi a. MNF chuan bial himsa 10 a nei tiin, "Inthlanah kan sorkar leh ngei dawn," tiin, "Manipur buaina chungchangah Aizawl care-of lovin thil an ching fel thei lo," a ti bawk.

Aizawl East-I bialtu Zoramthanga chuan tunhma lamah MNF chuan bial 5 hloh sa tlukin inthlan an hmachhawn thin tih a sawi a, “Tunah erawh chuan Bial 10 (Tlabung, E&W Tuipui, Thorang, Tuichawng, Lawngtlai E, Lawngtlai W, Mamit, Hachhek, Chawngte leh Dampa)-ah ZPM leh Congress tih tham an awm lo,” a ti a. "Eptute chuan Bial 30 atangin sorkar siam turin an rawn bei dawn a, an tan beisei tur a tam lo hle ang," a ti.

Zoramthanga chuan Zofate politics boruak sawiin, “Nationalism-a kan ngheh tlat avangin Manipur buaina (martar thlanmual) chungchangah Aizawl care-of lovin an ching fel thei lo. Union HM Amit Shah, Manipur leh Assam CM-te pawhin zan lai sawi lovin thurawn an rawn la a ni," a ti.

Mizoram pawna zofaten MNF sawrkar loh an hlau nia sawiin, “Burma, Bangladesh leh Manipur-a kan unauten hetah vote nei lo mah se, keini aiin MNF sorkar a pian loh an hlau zawk. Kan Jerusalem-ah hian hnam thinlung pute sorkar an mamawh a, tui anga nghet lote sorkar a pian loh nan theihtawp chhuah an tum,” tiin party mipuite pawh theihtawp chhuah turin a chah a ni.