Aizawl May 20, 2023 : ZPM chuan an Leader Lalduhoma hovin Dampa West bial chhunga khua, Pukzing Vengthar, Hruiduk, Phuldungsei, Parvatui leh West Phaileng khua te tlawhin an fehchhuak a, Dampa bial vil tura ruat Vanlalsailova chuan Mizorama bial hmasawn ber an nih theihna tur leh mipui sawrkar a din theihna turin bial mipuite thawhpuina a ngen. 

Zaithiam a nih vanga Zorawm mipuiin an hriat Vanlasailova chuan, “Dampa bial hnufual bikzia kan hre fo thin a, a taka hmutu leh a chhunga chengte harsatna mit ngeia han hmuh chuan a mi khawih dan a dang hle mai. Kan kawngpuite hian hliam a lo tuar nasa hle mai a, enkawltu nei lo ang mai a ni. Rilru thar pu ila, Mizoram a bial hmasawn ber kan nih theihna tur leh mipui sawrkar a din ngei theih nan bial mipuite inthawhpuina kan ngen a ni,” a ti. 

ZPM Leader Lalduhoma chuan, “ZPM a sawrkar dawn tih hi ruling party te hian an ring nghet tlat niin a lang a, nasa takin ZPM hi min bei mek a ni. Mi thar duhawm tak takin min rawn zawm zel a, heng zinga rawn lut tam ber chu rorel lai party atangin a ni. Hei hian chiang taka a entir chu tuna kan rama sawrkar lai mek hian an party chhungah harsatna namen lo an tawk tih a tilang chiang hle a ni,” a ti. 

ZPM leader chuan, “Kan thalaite zingah lehkha thiam tak tak an tam tawh hle mai a, hengte hi kaihhruai an ngai em em a ni. Ram danga thalaite khawsak dan leh hnathawh dan te kan hmu in kan hre zung zung thei tawh a; rual an awt em em a ni. Mi rama an tih theih hi kan ramah pawh tih theih a ni tih an hria a, chumi ti thei tura pui theitu tur chu ZPM hi a ni tih an hria a, an rawn zawm ruih ruih a ni,” a ti a. “ZPM hi mimal hamthatna atana  ding a ni lova, ram a dinchhuah theih nan a ding a ni. Mipuite phurrit chhawktu tur sawrkar kan mamawh a, chunglam thiltihthehna ring chungin kan ram hi kan dinchhuahpui theih ngei kan beisei a ni,” a ti bawk.