Zirtawpni atang khan Mizoram Synod hnuaia thalai pawl, Kristian Thalai Pawl (KTP) chuan Pastor bial hrang hrangah Bial KTP Conference hman mek a, Pathianni zan hian an tiak hlawm ang.

Zirtawpni hian chawhnu lamah bial thenkhatah chuan nomination committee thuin conference hi an tan a, zanah palai lawmna leh report inkhawm awmin bran tin leh bial secretary hnen atangin report ngaihthlak a ni.

Inrinniah khan chawhma inkhawmah bial puipate kaihhruaina hnuaiah kumina bial KTP hruaitu tur thlan a ni a, nilengin rorel inkhawm neih chhunzawm a ni.

Inrinni zan atangin Pathian Biak inkhawm a awm a, Pathianni chawhma, chawhnu leh zanah chhunzawm a ni ang.

Bial conference-ah hian bialin a ruahman angin inkhawm karlakah fellowship hun hman thin a ni bawk.

Confenrece hman dan tur hi bial committee-in ngaihtuahin a remchan dan anga hman thin a ni a, hei vang hian bial hrang hranga conference hman dan pawh a inang vek lo thin a, bial \henkhatah thupui thlan bik neiin speaker-ten an sawi thin a, bial thenkhatah chuan thupui thlan bik pawh nei lovin bial hruaituten an insawi chhawk chang pawh a awm thin.

Conference hi KTP rorel inkhaidiatah general conference-a rel tur thu ngaihtuahna hmasa a ni a. Tun tuma thu an ngaihtuah, zau zawka ngaihtuah ngaite chu Central KTP-ah thlen niin a tul dan azirin general conference-a sawiho tura chhawp chhuah a ni thin.

Kumin bial conference hi Central KTP hruaitute pawhin hmun hrang hrangah hmanpuiin an chhuak hlawm.