ZALEN, 03.01.2026 : Vawiin khan B Lalchhanzova chuan a bialchhung Chhinga veng Bethany Area a bawlhhlawh paih Motor in a thlen lohna hmuna bawlhhlawhte senghawi thin dan tur Bethany Area Caretaker Association te nen ruahmanna an lo siam tawh chu thlir letna hun a hmanpui a, he mi pah hian Armed thlertawi Welfare ten thlanmual kawng an siamthat hnatlang a tlawh nghal bawk a, kawng siam hnatlang te senso hi East-II MLA hian a tumsak a ni. 

Aizawl East II bialtu MLA B Lalchhanzova chuan vengchhung faina a ngaihpawimawh thu sawiin Bethany Area a bawlhhlawh paih Motor in a thlen lohna hmuna bawlhhlawhte felfai taka senghawi dan tur ruahmanna an siam thei chu lawmawm a tih thu a sawi a, a bial chhung hmun dangah pawh a tul dan a zirin ruahmanna siam zel a tum thu a sawi. 

Bethany Area Caretaker Association te nen hian Bawlhlawh paih chungchangah kum 2025 January thla atang khan kum khat chhung thawhhona thuthlung an lo siam tawh a, Kum 2025 chhung khan bialtu MLA hian Bawlhlawh lakhawmtute lawmman tur Thla tin Rs 6,000/- a lo tum sak tawh a, tunah hian December 2026 thleng thawhhona thuthlung hi an siam leh a ni.

Bethany Area Caretaker Association hruaitute pawhin kum 2026 chhung thawhho chhunzawmna tur thuthlung an siam leh thei chu lawmawm an tih thu sawiin Bialtu MLA in an harsatnate hriatthiampui a hma alak sak chu lawmawm an tih thu an sawi.