January 22, 2023; Vawiin tlai dar 4:30 bawr vel khan Zuangtui 132 KV peng phei ah bike leh gas phur truck an inpel sual a, bike a chuang Muanna veng, Aizawl a khawsa Lalrampara (27) leh a nupui Lalmalsawmhlui (23) te chu a hmunah an boral. Lalmalsawmhlui hi thla 3 mi vel naupai niin, an fanu kum 5 mi an kalsan.

Muanna veng Branch YMA hruaitute hnen atanga ZALEN thudawn danin, Lalrampara te nupa hian an hma a tlan gas phur truck tlan pelh an tumna ah chesualin, truck hnuaiah an inbarhlut a, ka pawh chhawnlo in an boral nghal a ni.

Vanduaina tawk a boral Lalrampara te hi nupa inhmangaih thiam tak an ni tih thudawnna te chuan sawiin, an ruang hi naktuk zingah postmortem an ni ang a. Anmahni hi presbyterian kohhran an ni a, naktuk chawhnu dar 1 ah Pastor R. Lalhmangaihan a vui ang.

Truck khalhtu hi Mizo niin, he vanduaina an tawhah hian hrehawm a ti hle tih thudawnna te chuan an sawi bawk.