Akon leh Eminem te music video ‘Smack That’ chuan YouTube-ah viewer tluklehdingawn khat an nei tling ve ta. He hla hian a hun lai khan Billboard Hot 100-ah No.2 a kai phak a, Billion Views Club-a kai tur meuh erawh chuan kum 13 zet hun a mamawh thung. 

'Smack That' hi kum 2006 khan tihchhuah a ni a, American singer Akon chuan rapper lar Eminem thawhpuiin an thlawh fuh rem rem hle. A hun laia hla lar ber zinga mi a ni a, kum 2009 khan YouTube-ah upload a ni chauh thung. Music video dahchhuah a nih atanga thangkhat lian chuang zet a vei hnuah viewer tluklehdingawn khat hi a nei tling a, Nilaini khan mellung hi a phun ve ta a ni. 

Youtube Billion Views Club-a lang phak hi chhiar tham lek an la ni a, hei hian a ropui zia a tarlang chiang ber awm e. November 2005 khan Nike chuan advertisement-ah Brazilian football player ropui Ronaldinho an hmang a, hei hi viewer 1,000,000 nei kai hmasa ber a ni. Kum 2012 khan Gangnam Style chuan record siamin tluklehdingawn a rawn kai a, a hmasa ber a ni. Hei hnu hian 2017 khan 'Despacito' a rawn lang ve leh bawk a, Luis Fonsi leh Daddy Yankee te hla hian viewer tluklehdingawn 8.08 zet neiin rimawi huanga entu gah ber dinhmun a luah mek. 

YouTube hrim hrima video enhlawh ber erawh Pinkfong 'Baby Shark' a ni a, viewer billion 10 nei kai hmasa ber niin, 12.27 billion zetin an en tawh a ni.