Biometric Attendance Management system (BAMS) awmzia chu biometric authentication hmanga hnathawktu ten an hnathawhna hmun (Office) an thlen hun leh an haw hun fel fai taka chhinchhiahna a ni. Biometric Attendance Management systemah hian components hrang hrang Biometric machine, Data server, Internet/Network, Attendance Manage­­ment software a awm. Biometric Attenance Management hi rang tak leh awlsam taka hman theih (user-friendly) tura siam a ni. Employee ten kut zung tang hmang emaw, mit hmanga authentication tih mai tur a ni. Mizoramah pawh hmun thenkhatah chuan kan hmang mek a, a bikin NIELIT Aizawl Office ah phei chuan kum 2014 atang daih tawh khan hman a ni tawh.

BAMS kalphung tlangpui chu- A hmasa berin Attendance lakna khawlah employee te enroll vek phawt tur a ni. Attendance lakna khawla in enroll zawng zawng te Biometric data hi serverah dahkhawm vek a ni. Tin, heng data te hi khawih danglam theih loh tura encrypt vek a ni. Office/ Institution luhna ah emaw, hmun remchangah Attendance lakna khawl hi dah a ni a, Office thlen hun leh ban hun apiangah Employee ten an kutzung remchang ber hmangin an sign thin. Tichuan,Attendance lakna khawl hi data server nen Cable a thlunzawm a ni a, server atang hian software hmangin admisnistrator ten an hmu thei a, a tul hunah an print chhuak tawh mai thin.

Biometric Attendance Management system (BAMS) kaihhnawih hriat tur pawimawh langsar zual te han tarlang ila:

1. Authentication :

A awmzia chu kan taksa pian­zia hmanga keimahni chhin­chhiahna bik hmanga keimahni ngei kan ni tih finfiahna a ni. Authentication hi chi hnih a awm a, chung te chu:

i. Traditional Authentication: Hawrawp, Number, Pattern hmang a siam hmanga keimahni ngei kan ni tih chhinchhiahna leh finfiahna a ni. Heng te hi vawin thlenga kan hman lar ber ber te an ni. Mahse, midangin kan password, Screen pattern ,PIN, OTP te an lo hriat ruk erawh chuan duhtawkin kan hmanrua an hmang ru thei thung hi a that lohna a ni. Attendance Management system atan chuan midang a sign sak thei dawn avangin a rintlak loh. A langsar zual te chu: Aadhaar Card based leh Radio Frequency Identification (RFID) Card te hi Traditional Attendance Authentication langsar zual te chu.

 ii. Biometric authentication: Kutzungtang zia(fingerprints), Mit note zia (iris patterns), hmai pianzia (facial features), leh Kutzia(palm prints) hmanga keimahni ngei kan ni tih chhinchhiahna leh finfiahna a ni. Biometric authentication ah hian data in ang a awm thianglo. Kan finger print, Mitnote ziarang, kutphah te hi midang milpui awm lovin a pianzia a lo hrang vek hi hetiangah tak hian a tangkai hle. BiometricAttendance Authentication langsar zual te

Fingerprint recognition, Facial recognition, Iris detection, Vein Pattern System, Voice Recognition

2. Authentication Biometric data dahkhawmna (Biometric Server)

i. Local Server: Data dahkhawmna Server hi Department/Institution ah a awm nghal mai thin. Attendance lakna khawl nen cable in an thlunzawm mai a, Internet / Network hranpa a ngailo. Local server atang hian awlsam taka attendance data hi lakchhuah theih a ni.

ii. Remote Server:Data dahkhawmna Server hi hmun dang daihah ah a awm. Attendance lakna khawl nen Internet / Network hmanga thlunzawm a ni. Attendance sign nan leh data lakchhuah nan Internet / Network neih ngei ngei a ngai.

iii. Cloud Server:Data dahkhawmna Server hi company server ah dahkhawma ni. Attendance lakna khawl nen Internet / Network hmanga thlunzawm a ni. Attendance sign nan leh data lakchhuah nan Internet / Network neih ngei ngei a ngai.

3. Biometric Registration /Enrollment tih dan:

Office ah hman dawn chuan BAMS khawlah employee zawng zawng te register vek tur a ni. Hemi atan hian Biometric Data Capture Devices ( fingerprint scanners, iris scanners, facial recognition cameras, or palm scanners ) an hmang thin. Registration mahni a duh duh a tih theih a nilo a, System administrastor ten min tihsak thin. A tihdan chi hnih a awm :

Finger Print enrollment process:

Employee ten an hmet a, an kutzia thla chu a la a. Image processing hmangin finger print data template a siam a. Chhiar ruk theih loh (encryption) leh khawih danglam (Tamper) theih loh turin Server ah a save thin.

Face Image enrollment process:

Camera hma ah kan dinga, kan hmai thla a la a. Image processing hmangin kan hmai pianzia( Landmark, Alignment, Embedding) chhinchhiah a. Frame processing hmangin kan hmai pianzia te hi ala chhuak a. Facial database a siam a. Chhiar ruk theih loh (encryption) leh khawih danglam (Tamper) theih loh turin Server ah a save thin

Registration tih lai hian fimkhur a tul hle. Kutze thla lak angaih avangin kut fai taka sil a a tha. Tin, mit note scan laiin tarmit bun loh a fuh bawk. Kan uluk loh chuan fingerprints, iris patterns, facial features , leh palm prints te hi khawlin a hmu tha thei thin lo a, a buaithlak thin hle. Registration tih fel hnuah employee data te hi a tul hun apianga hman theih turin vawnthat vek a ni.

4. Biometric Attendance Sign dan : 

Office kal ni apiangin finger print emaw, mit note hmangin office thlen hunah Biometric Attendance lakna khawlah kan sign in anga, ban dawnah kan sign out leh thin ang. Attendance sign dan chi hnih a awm a, chung te chu

i . Finger Print hmanga attendance lak dan process:

Employee ten an kutzung remchang ber hmangin an hmet a, an kutzia thla chu a la a.Image processing hmangin finger print data template ah a letling a. Server a finger print data template a lo khawlkhawm sa nen a milpui a zawnga. A zawn hmuh chuan Confirmation message a thawn a. Attendance a la zo ta. A zawn hmuh loh chuan Error message a thawn a. Kut hruk fai a, hmehnawn leh tur.

ii. Face Image attendance lak dan process:

Camera hma ah kan dinga, kan hmai thla a la a. Image processing hmangin kan hmai pianzia chhinchhiah a. kan hmai ziarang ala chhuak a, Server a a lo khawl-khawm sa nen a milpui a zawnga. A zawn hmuh chuan Confirmation message a thawn a. Attendance a la zo ta. A zawn hmuh loh chuan Error message a thawn a. Uluk taka camera hma a din leh mai tur

Finger Print hmanga attendance sign dawn hian kut a balh chuan a hmu theilo. Silfai emaw, puan hnawm chip chepa hruk hmasak a tha. Liah duai duai loh tur. A hrisel lo. Face Image attendance anih chuan uluk deuh a camera hma din mai a tawk. Tarmit bun hian a hmu har duh a, hlih zel mai a fuh ber.

5. Biometric Data Processing and Storage:

A tul hun apiangah (Weekly, Monthly) Attendance report hi print chhuah theih a ni bawk. Employe ten fingerprints, iris patterns, facial features , leh palm prints hmanga attendance an sign apiangin Data Capture Devices chuan he database atang hian a milpui a lo zawngchhuak thin. Hemi zawnchhuah nan hian Advanced algorithms a hmang a,a milpui a hmuh veleh verification confirmation message / Audio a rawn tarlang mai thin. Entirnan: Facial recognition kan hman chuan "You are verified, Thank you" tih Audio in emaw, ziakin a rawn lang ang. Aadhaar based attendance system a finger print kan hmang anih chuan confirmation hi email ah i dawng tel bawk ang.

6. Attendance Tracking,Reporting and Analytics::

BAMS khawl hian sana a nei nghal vek a, Employee te sign in leh sign out hun hi a tul hun apianga check theih turin khawih danglam theih loh turin system database ah recod zel a ni. BAMS khawl hmang hian a tul hun apiangah employee attendance check theih a, kal tlai leh kallo, haw hma leh haw tlai reports awlsam takin a print chhuah theih bawk. Action lak a tul hunah pawh awlsam takin mimal report a siam theih bawk. BAMS hian Human Resources (HR) management systems, payroll software,leh enterprise applications hrang hrang a atul dan a zir zelin thlunzawm a ni a, data te hi share thin a ni. Employee hnathawh dan te leh hlawh pek dan thlengin an hmang thin.

7. Security and Compliance:

BAMS khawla employee registration Database hi GDPR (General Data Protection Regulation) and HIPAA(Health Insurance Portability and Accountability Act) privacy regulations zulzuia computer (Server) ah database template felfai tak nena vawnthat vek a ni, Heng database hi encrypted vek anih avangin a ruka midang data enthlak leh khawih danglam theih a nilo. A him em em a ni.

Conclusion:

Tunhma deuh khan Biometric Attenance Management system hi hman chhin a ni tawh a, kan hmang tha duh lo khawp mai. Reilo te ah khawl manto tak tak te kha kan tichhia a, register bu bawk kan hmang leh a. Sorkar hnathawk Office kal tlai leh haw hma kan thahnem viau mai a, ZPM sorkarin a rawn ngai pawimawh thar leh hi a lawmawm hle. Kan hmang dawn tak tak anih chuan a hun taka thlen leh haw a ngai tawh ang. Hetiang anih takah chuan Attendance Register book a kan in sign sak ang kha a theih dawn tawh lo a, An kut emaw, an mitmu emaw, kan keng te anih ngawt loh chuan midang a in sign sak theih loh! Inthlahdah deuh tan chuan a buaithlak viau mai thei!

A tawp berah chuan Monitor ngailovin hun vawng dik ila, rinawm leh taima takin hnathawk ila a duhawm hle. Kan rilru a dik loh chuan enga khawl tha leh changkang pawh hmang ila awmzia a nei chuang lovang. Digital khawvelah kan cheng tawh a, Biometric authentication hi kan hmang tam telh telh dawn.Tun tanga reilo teah chuan Zirna inah leh private business ah pawh kan la hmang deuh vek ang. Pawisa tam tak senga kal kim lawmman kan sem thinna Sunday schoolah hial pawh attendance lak nan kan hman hun pawh a la awm mahna!