Birmingham City chuan thla thum pawh tling lova parukna an nih laia an lak luh, 20-naa tlak thlakpuitu, manager Wayne Rooney chu an bân ta nge nge.

Championship club hian ni 83 liam ta, October 11 khan parukna nihpui mektu, John Eustace-a rin loh taka an ban thut aiawhtu atan kum 38 mi hi an lak luh kha a ni.

Manager thar hnuaiah hian Blues hian hma lam pan aiin hnungtawlh zawngin an kal a, Thawhtannia Leeds United laka 3-0 a an tlawm leh hnuah phei chuan 20-na daih an ni ta a. Hei hi inkhel vawi 15 chhunga vawi kua an tlawmna a ni ta bawk.

England captain hlui, Rooney-a hian Blues hma hian Derby County leh MLS-a DC United a lo enkawl tawh bawk.

Birmingham-in Rooney-a an manager atana an ruat hi December, 2016-a thil thleng nen pawh tehkhin hial a ni a. Chet chhiatpuitu ni lem lo, Gary Rowett-a bân thutin a aiah khawvel hriat hlawh, Gianfranco Zola an la lut daih a ni.

Zola hian Rooney-a ang bawkin a chet thatpui lo va, vawi 22 a khelhpuiah vawi hnih chiah hnehna chanpuiin April, 2017-ah bân lehnghal a ni a, Harry Redknapp-a’n a thlak.

Blues neitu thar, American Shelby Companies Limited-in Rooney an lak luh hnuah hian khawvel huapa hriat hlawh an nih phah an inbeisei hle a; mahse, ani pawh hian Zola ang bawkin vawi hnih chiah a chakpui a. A ruaitu board-in khelmuala a hlawhtlinpui an beiseina leh mi hriat an nih an beiseina a phak lo hle a ni.

October thlaa Millwall chhuahsantu, Rowett-a bawk hi a lailawka lak an tum zingah a hming pawh a ri leh tho a ni.

Blues hi tlahniam thei dinhmuna dingte aiin point ruk chauhvin an sang tawh a, Inrinni hian FA Cup 3rd-round-ah Hull City an tlawh ang.

January bazar hun inkhar hmain inkhel pawimawh pathum, an chunga awm vek hmachhawn tur an nei a. Swansea leh Middlesbrough an mikhual ang a, Stoke an tlawh bawk ang.

Rooney-a an lak luh kha nipui bazar tawp hnuah a ni a, tun tumah erawh mi tharin bazarna hun remchang a neih theih nan kawng an hawnsak nia ngaih a ni.