BJP chakna leh pawisa it ve lo sorkar siam a tul - Lalsawta; MPCC in Manipur chungchangah resolution an pass
Tualchhung
Jul 07, 2023

July 7, 2023; MPCC president Lalsawta'n BJP chakna leh pawisa it ve lo sorkar siam a tul tih sawiin, "Chumi atan chuan India leh khawvel hmun hrang hranga thalaite ngaihsan rawn Rahul Gandhi pawh Mizoramah a lo kal thuai dawn. Congress Party hian Zoram mipuite tan sorkar tha kan tiam," a ti.

ad
ad

MPCC Campaign Committee huaihawtin Lal Thanhawla Auditorium, Congress Bhawan Aizawlah Mi thar lawmluh hun hman a ni a, he hun a thusawitu Lalsawta chuan, Mizoram chhunga hnam hrang hrang leh kan sakhua a him theih nan BJP sorkarna paih a ngai tih sawiin, "MPCC hruaitute leh AICC hruaitute inkawmnaah Mizoramah Congress party-in sorkar tha, a ram chhunga hnam leh sakhua humhimtu tur, BJP chakna leh pawisa it ve lo sorkar siam a tul a, chumi atan chuan India leh khawvel hmun hrang hranga thalaite ngaihsan rawn Rahul Gandhi pawh Mizoramah a lo kal thuai dawn. Congress Party hian Zoram mipuite tan sorkar tha kan tiam a. Politician, ram aia mahni in dah hmasa zawk te kan hnawl dawn a, Mizoram mipui pawhin hetiang mite hi hnawl turin ka ngen a ni," a ti.

MANIPUR CHUNGCHANG MPCC RESOLUTION
"May 3, 2023 atanga kan thenawm State Manipur a Meitei leh Zofate inkara inbeihna thleng mek hi Congress party chuan a tir te atangin ngun takin a thli thlai reng a. He Manipur buainaah hian a phenah BJP sorkar thiltum ruk (hidden agenda) a awm ngei niin kan hria a ni.
 
Kristian te Biak In tam tak suasam a, hal chhiat a nihnaah leh hnam tenau zawk te rawtchimih tum a, thiam tak leh rawng taka hmalakna kal mekah te hian Manipur BJP sorkar hi thuk takin a inrawlh ngei tih hi Congress party ngaihdan leh hmuhdan a ni.
 
Hetiang thil rapthlak tak, India ram inpumkhatna thlenga tiderthawng thei a thlen mek laia Prime Minister Narendra Modi an India khua leh tuite thlamuan tura tawngkam khatmah ala chhakchhuak duh lo hi hriatthiam theihah kan ngai lova. He buaina hi a rang thei ang bera hmehmih a nih theihna turin Sorkar laipui thachakna hmangin, chak taka hmala nghal turin Prime Minister Narendra Modi hi kan phut bawk a ni".

Latest News & Chhiar Hlawh