Aizawl April 12, 2024 : AICC General Secretary Jairam Ramesh chuan, "Tun tum inthlan tur chu India ram Democracy tan a pawimawh em em a. Indian ramah hian Democracy hi a a bo mai loh nan leh chawinun a nih zel theih na thawh a ngai a. BJP hian India mipuite thenhran nan UCC kalpui a tum a, Congress erawh chuan India ram inpumkhatna atan kan thawk a ni," a ti.

Congress Minister hlui chuan, "India ram chu hnam hrang hrang, sakhaw hrang hrang awm khawm kan ni a, BJP hian One Nation, One Religion, One Language te hmangin tawng hrang hrang leh hnam hrang hrang te UCC hmanga tih bo a tum a ni. Manipur a thil thleng te khi, mi tamtak an thi a, in tam tak hal a ni a, BJP chuan mawhphurhna la duh lovin midang an dem leh daih a ni. BJP hian mipuite hi indo tir a, thenhran vek a, awpbeh a tum a ni," a ti.

Rajya Sabha MP ni mek chuan, "Manipur a thil thleng hi a bul tanna chauh a ni a. Mipuite a inhuattir a, buaina an siam a, chutiang chu a thlentir zel an tum a ni," a ti.

Congress-in intiamna 5 an neih leh an Manifesto, tihhlawhtlin an tum Congress Manifesto panga a puang.

1. Thalaite tana sawrkar hna nuaih 30 siam leh College Degree leh Diploma nei te stipend pek kan tum a.

2. Loneitute taba MSP pek te, loan thaibo sak te leh GST chawi tir loh kan tum bawk a.

3. Hmeichhe ta kum khatah nuai khat pek te, sawrkar hna a zaa sawmnga hna haih sak te kan tiam a.

4. Nitina inhlawhfate NREGA ah nikhatag ₹400 bakah Health Care nuaih 25 thleng an bill theihna tur siam kan tum a.

5. Socio Economic caste census neih te, FRA dil te kum khat chhunga tihfel sak zel te kan tiam a ni.

Jairam Ramesh chuan, "Keimah ngei pawh Union Commerce minister ka nih lai 2008 khan Sittwe atanga rawn kal tur kawng, Zorinpui to Aizawl thlengin kan hmalakna a ni. Zokhawthar Border Trade te ka tlawh tawh a, Tlabung Border Trade te pawh ka tlawh tawh bawk a. Kan PM hian Act East policy te hi a sawi thin a, a takah engmah a ti lo a ni," a ti.

"Congress kaihhruai hian INDIA Block din a ni a, tun tum MP inthlanah hian chiang takin kan tling ngei kan ring a. India mipui te hian BJP lemchanna hi an kham tawh a, dawta an intiamna te hi an kham tawh ani. ZPM leh MNF te hi BJP ngheng hnai tute an ni a, chu chu an thusawi ah te pawh a lang a ni," a ti.

AICC GS chuan, "Article 371(G) te hian kan hnam zia te, kan culture te, kan ram leh hnam min humhalh sak a ni. Article 370 chu awlsam takin an thiat hmiah mai a. Congress chuan India mipuite hi inngeih takin awm ila, zalen taka kan cheng za theih nan kan thawk thin a, BJP erawh chuan authoritarian sawrkar din an tum a ni," a ti bawk.