ZALEN February 3, 2025 : MPCC President Lal Thanzara chuan ZPM sawrkar chu BJP an zawmna leh thu intiamna an tih hlawhtling loh avangin hrek mek an ni a, BJP duh dana an awm chuan Kohhran rilru an hliam dawn avangin tuilairapin ZPM sawrkar an awm mek niin a sawi.

Taitesena Hall, Kolasib Venglaiah Kolasib Block-I te chuan Political Training leh mithar lawmluhna hun an hmang a, he hunah hian Lal Thanzara chuan, "ZPM sawrkarin BJP an zawmna leh an thu intiam tawn ang an tih hlawhtlin loh avangin BJP sawrkar in a hrek a. Central dawrtu CM leh Minister te thil hawn chu thlalak thar an neih belh chauh hi a ni. BJP duh anga an awm hma loh chuan engmah an ti thei dawn lova, BJP duh anga an awm hun hunah Kohhran rilru an hliam dawn avangin tunah hian tuilairapin ZPM sawrkar hi a awm mek a ni," a ti.

Rulling party chhuahsan tun ang hian a thleng ngai lo tih sawiin MPCC President chuan, "Sawrkar inthlakah sawrkar hlim Local Council leh Village Council inthlanah sawrkar lai belin mi tam takin Ruling an bawh thin a. Seat pawh hneh takin an la thin. Mahse ZPM sawrkarah chuan sawrkar laia VC te, LC Member te, ZPM hruaitu leh party member ten nitin ZPM an chhuahsan a. Hetiang hi thil thleng ngai lo, sawrkar laiah Mizoram mipui leh party mipuiin rinna an neih loh vang leh beiseina an neih loh vang a ni tih sawiin, tun hnaiah kan unau ZPM, MNF leh Neutral unauten phur takin Mizoram hmun hrang hrang atangin Congress an rawn zawm hi Pathian hnathawh a ni," a ti.

Lal Thanzara chuan, "Politics hi rawngbawlna a ni a, dawt leh mahni inhaivurna tur a ni lo tih sawiin, Party a kan awm chhan eng nge? Kan party awmnaah hian kan ram, kan hnam, kan sakhua a him em? tih kan ngaihtuah a tul. Congress Party hi India Zalenna sual chhuaktu, India rama hnam hrang hrang leh sakhaw hrang hrang him taka an awm theihna tura dan siamtu party leh sakhaw zalenna kengtu a ni. Sum thianghlim lo nena lalna changa kan sakhaw zalenna min palzut saktu te nena nghawngkawl inbah tawn hi Kristian te tan chuan a thiang lo a ni," a ti.

"Congress Party chuan mitin thleng phak ruahmanna NLUP changtlung zawk hmangin Mizoram dinhmun kan siam tha leh dawn. Eizawnna harsatna leh sum vâng lutuk vanga mipuite tawrhna zawng zawng hi thawnthuah kan chantir dawn a ni," a ti bawk.