Aizawl February 26, 2024 : Vawiin khan BJP Mizoram chuan karthar inhlanna leh Political Session hun BJP State Office Upper Republic Mipui Run ah neih niin Vanlalhmuaka, State President-in thusawina hun a nei a, Mizoram-ah BJP an tlin loh avangin Mizoram-in sum tam tak a chan phah niin a sawi.

Vanlalhmuaka chuan, "Mizoram mamawh em em PM Pu Narendra Modi leh BJP National President Pu JP Nadda ten hria in, Mizoram reitheihna ata khai chhuahna atan Manifesto kum 2023 Election ah khan Central ah a hranpa a sum zuk dil ngai lovin min siam sak a. Chu chu Mizoram-ah hmarchhak state dangte anga BJP telna sawrkar a pian chuan kan hman nghal theih turte a ni. Chung Manifesto langsar zual te chu State Govt financial assistance atan Crore 22500 , Loneitute dawmkawnna tur Crore 1000, Zirna lam siam that na atan Crore 900, Health infrastructurr lam tihchangtlunna atan Crore 500, ZMC regional Institute of Medical Science ah hlan kai te, Tourism kal ngaihna hre lo tihchangkanna atan Crore 250, Thingtlang leh khawpui hmasawnna hna thuanawp tawh tihthatna atan Crore 1400, PM Kisan Mizoram bikah Rs 6000 ni thin chu Rs 8000 ah tih san te, PM Ayushman Bharat Nuai 5 kha nuai 10-a tih san te kha a langsar zualte a ni," a ti

BJP Mizoram President chuang, "Heng hi kan budget piah lama Mizoramin kan hmuh theihte a ni. Nimahsela Mizoram mipuiten party ruihchilhna avang leh mahni lal duhna avangin khing zawng zawng Mizoramin kan dawn theih te chu hnawlin tunah hian kan state hi a sawrkar chawpin kutdawhah kan chhuak leh ta vek hi a pawi hle a ni. Chuvangin Mizoram mipuite kan harh a ngai a, Political Party-te pawhin Party Politics chauh nilo, Mizoram Hmasawnna thlenna tur tak tak Politics hi kan ngaihtuah tel a, rilru kan sen tlan a ngai a, MP Election kan hmabak ah hian kan State hmakhua thlir chunga Vote kan thlak thiam tawh ngei a pawimawh hle dawn a ni," a ti bawk.