Aizawl July 11, 2023 : Aizawl District Congress Committee (ADCC) leh Operation E-Roll hotute bultumin 'Aizawl City Congress Operation E-Roll Training & Briefing' chu Lal Thanhawla Auditorium, Congress Bhawan-ah hman a ni a. MPCC President Lalsawta chuan "BJP thawhpui ve ngai lo tur Congress Party hian sorkar ṭha kan siam a ngai a ni," a ti.

He huna thusawitu Lalsawta chuan, "India rama mihring cheng tawh phawt te chu zalen takin awmho i la, sakhaw tih bik nei lovin, mi hnuaihnung zawk leh khawsa thei zawkte pawh him taka kan awm tlân theih hi a pawimawh êm êm a. Chutiang tur chuan Congress Party hi India ramah a tho leh mek a; Mizoramah pawh kan tho chhuak mek a ni, a ti. Kum 2023 MLA General Election-ah hian Congress Party a sorkar loh chuan BJP thawhpuitu te'n sorkar an siam leh a ngai dawn a. Ram leh Sakhua tan a him lo a, a pawi êm êm a ni," a ti. "BJP thawhpui ve ngai lo tur Congress Party hian sorkar ṭha kan siam a ngai a ni," a ti bawk.

Lalsawta chuan, "Kei leh ka thawhpuite zawng zawng hian eirukna do turin sorkar ṭha siampui ngei che u kan tum a, eirukna do a har lohzia kan hrechiang êm êm a, kan ti thei a ni. Kan sawi fo ṭhin "Țang Puihna" hmangin ram ṭha kan siam ang a, ṭang taka hnathawkte kan pui ang a, ṭan ngaihna hre lo khawpa harsate kan pui ang a, kan ramah hian mi rethei leh hausa inkar ti zim a, ram ṭha siam turin theihtawp kan chhuah dawn a ni," a ti a. "Congress Party hi sakhaw zalenna duhtu leh mi rethei chawikâng ṭhin a lo nih tawhna châwi nung zelin ram ṭha siam tûrin kan lo pênchhuak a ni," a ti bawk.

Lal Thanzara chuan, Sakhaw zalenna duhtu Congress Party hi chu BJP naute a ni ve dawn lo a, a ni thiang bawk lo a ni, a ti a. He Kristianna ti dal thei, tih dal tum hi Central-a an Lal reng chuan kan ram pawh hi a tlu chhe vat dawn a. Central-a BJP a sorkar reng a, kan ramah MNF emaw, ZPM an sorkar chuan BJP naute (BJP Support Party) kan nei reng dawn a. Kan ram leh hnam tan a him lo a ni. Chuvangin, mipuiten ka ram leh hnam a lo him a, India ram pumpuiah Kristian te'n sakhaw zalenna kan lo neih theihna atan Congress Party support turin Mizoram mipuite ka sawm che u a ni, a ti bawk.

RESOLUTION

1) Ni 11.07.2023 (Thawhlehni) a Aizawl City Congress Operation E-Roll Training & Briefing Lal Thanhawla Auditorium, Congress Bhawan-a neiha kal khawmte chuan kan ram Politics che vel a thlir a, kan ram, kan hnam leh kan sakhua a him a, hmasawnna ngelnghet leh tlo kan neih hi tul kan ti tak zet a ni.

2) Kan ramah sorkar tha, khua leh tui zawng zawngte innghahna tlak a pian ngei theih nan, Pu Lalsawta kaihhruai sorkar pian ngei tul kan ti a, a kaihhruaina hi kan ring tawk a, vawiina lo kal khawm zawng zawng te'n lungrual takin Aizawl City huamchhunga Constituency zawng zawngah Congress a chak ngei theih nan hma kan la dawn a, Neutral leh mipui zawng zawngte pawh in VOTE hlu tak kan dil nghal che u a ni.