Aizawl July 11, 2023 : Vawiin khan Congress chuan Serchhip district hmun thenkhat an tlawh a, he huna thu a sawi naah MPCC Treasurer Dr. Lalmalsawma Nghaka chuan India ram chu thuang hnihin a kal mek a ti a, sakhaw zalenna duhtu leh Hindu Lalram din tum te an nih thu a sawi a. BJP thawhpuitu Chief Minister Zoramthanga chu zohnathlakte thlavang hauh ngam lovah a puh.

Nimin khan Congress chuan Dr. Lalmalsawma ho hian Baktawng, Chhuanthar, Chhingchhip te an tlawh hnuah Serchhip Bazar kawnah Public Meeting an nei a, he hunah hian Lalnunmawia Chuaungo, IAS Rtd., Vanneihthanga Vangchhawng leh Meriam L. Hrangchal te pawhin thu an sawi a ni.

MPCC ten Serchhip bazar kawna Public Meeting an neih tuma thu sawitu Dr. Lalmalsawma Nghaka chuan, "India ram hi ṭhuang hnih lianpuiin kan kal mek a. Politics-a hausa ber BJP leh a thawhpuite ṭhuang khatah awmin anni chuan Hindu Lalram an din a, a rang thei ang bera Uniform Civil Code min hman tir tum tute an ni. A ṭhuang lehlamah India zalenna sual chhuaktu Congress leh a thawhpuite an awm bawk. Congress Party chuan India ramah hnam hrang hrang leh sakhaw hrang hrangte zalen taka an awm theih nan hna a thawk ṭhin. Khawi lamah nge bân kan phar dawn? Sakhaw tê zawkte nuai chimih tum tute lamah em ni bân kan phar dawn," a ti.

Dr. Lalmalsawma Nghaka chuan, "Kan ṭhenawm State maiah BJP sorkarna hnuaiah kan zohnahthlak ten chi leh chi intihbuaina avangin harsatna an tawk mek a. Biak In tam tak an ti chhe tawh. Biak In meuh an hal chhiatna hian chi leh chi intihbuaina ringawt ni tawh lovin kan sakhua pawh min bei tel tihna a ni a. NEDA hnuaia BJP thawhpuitu kan CM chuan kan zohnahthlakte thlavang hauhna ṭawngkam vawikhat pawh a la chhak chhuak lo. BJP ten an hmanruaa an hman ve theih loh party pakhat chiah a awm. Chu chu Congress Party hi a ni. Hmarchhak State ah Kristian CM pathum kan nei a. Nagaland, Meghalaya leh Mizoram te hian Kristian CM kan nei. Nimahsela, heng CM pathumte hi BJP thawhpuitu an nih avangin Kristian Biak In an hal lai ngei pawhin Kristiante thlavang hauhna ṭawngkam vawikhatmah an chhak chhuak duh lo. BJP tha chhu chat turin India rama party liante an intelkhawm mek. BJP lamah nge Congress lamah kan kal dawn tih hi ngun takin i ngaihtuah ang u," a ti bawk.

Tunhnaia Congress zawm ta, Mizoram Chief Secretary hlui Lalnunmawia Chuaungo pawhin thu sawiin, ram rorelna ṭha leh dik nei tura ram hruaitu dik pawimawh zia sawiin, "Hruaitute an ṭhat chuan mipuiten malsawmna an dawng ṭhin a. Hruaitu ṭha nei lo mipuite erawh an rethei a, chu chuan sualnaah a hruai lut ṭhin a ni, a ti. Kan ramin MLA ṭha leh Minister ṭha nei mah ila, CM ṭha kan neih loh chuan chung MLA leh Minister te chuan engmah an ti thei chuang lovang. CM ṭha hnuaiah erawh mi ṭha lo nia kan hriatte pawhin mipuite tan hna nasa takin an thawk thei thung a ni," a ti.

Lalnunmawia chuan, "Hruaitu huaisen, sum leh paia rinawm a ni tih mipuiin kan hriat sa Lalsawta hruaitu atana kan nei hi ka lawm a. Ama hova Pathian leh mipui zara 2023-a Congress Party-in sorkarna kan chang a nih chuan kuthnathawktute tana malsawmna ni turin hna kan thawk dawn a. Kan hruaitu lu ber Sawta hi thil ṭha duh a ni. Ani kaihhruai sorkar thar a pian hunah Mizoram hian hmasawnna nasa tak a nei dawn a ni," a ti bawk.